បន្ទាយមានជ័យ ៖ រថយន្តស្ព័រ ដែលត្រូវកែច្នៃពីរថយន្តកាម៉ារីស៊េរីឆ្នាំ១៩៩៣ ដោយកូនខ្មែរអ្នកខេត្តបន្ទាយមានជ័យ ដែលល្បីល្បាញនៅលើបណ្តាញសង្គមនោះ ត្រូវបានក្រសួងសាធារណការ និងដឹកជញ្ជូន បដិសេធមិនព្រមធ្វើ ឈៀក ឲ្យឡើយ ដោយថា វាជាការកែច្នៃខុសច្បាប់ និងរំលោភកម្មសិទ្ធិបញ្ញា។
លោក ឈួន សុផាន់ ដែលជាម្ចាស់រថយន្តកែច្នៃនោះបានបញ្ជាក់ថា នៅពេលឡើងឈៀក លោកបានប្រាប់ទៅមន្ត្រីជំនាញថា នេះជារថយន្តស៊េរីចាស់ដែលត្រូវកូនប្រុសលោកយកទៅធ្វើការកែច្នៃជារថយន្តស៊េរីថ្មីបែបទំនើប។ ពេលនោះមន្ត្រីជំនាញបានត្រួតពិនិត្យលើឯកសារថាមានគ្រប់គ្រាន់ តែរថយន្តត្រូវបានកែច្នៃជារថយន្តថ្មី ទើបមន្រ្តីថតរូបបាញ់ទៅក្រសួងជំនាញពិនិត្យ ហើយមកទល់ពេលនេះ ទើបលោកទទួលព័ត៌មានមកថា ក្រសួង មិនបានចេញលិខិតបញ្ជាក់ឈៀករថយន្តឲ្យទេ ដោយក្រសួងប្រាប់ថា រថយន្តកែច្នៃនោះ ខុសច្បាប់និងរំលោភកម្មសិទ្ធិបញ្ញាម្ចាស់ដើម។
ខាងក្រសួងបានបញ្ជាក់ទៀតថា បើសិនជាក្រសួងចេញឈៀកឲ្យ គឺវាហាក់ដូចជាលើកទឹកចិត្តឲ្យមានការកែឆ្នៃកាន់តែច្រើន ដែលអាចនាំឲ្យប៉ះពាល់ដល់សុវត្ថិភាពអ្នកប្រើប្រាស់ជាយថាហេតុ។
គួរបញ្ជាក់ដែរថា កាលពីពេលថ្មីៗនេះ នៅលើបណ្តាញសង្គមបានផ្ទុះនូវការកោតសរសើរដល់ស្នាដៃរបស់កូនខ្មែរម្នាក់រស់នៅស្រុកមង្គលបូរី ក្រោយពីគេបានកែច្នៃរថយន្តចាស់របស់ខ្លួន ទៅជារថយន្តស្ព័រ រហូតដល់មានការកោតសរសើរពីចៅហ្វាយខេត្តបន្ទាយមានជ័យ គឺលោក អ៊ុំ រាត្រី ទៀតផង៕