(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសថា នៅថ្ងៃទី១ ខែតុលា តទៅ ដំណើរការពិនិត្យបញ្ជីឈ្មោះ និងការចុះឈ្មោះអ្នកបោះឆ្នោតថ្មី នឹងផ្តើមធ្វើនៅតាម ឃុំសង្កាត់ សម្រាប់រយៈពេល ១៩ ដោយនឹងបញ្ចប់នៅថ្ងៃទី ១៩ ខែតុលា ឆ្នាំ ២០២០។
លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប បានបញ្ជាក់ថា ការងាររបស់ គ.ជ.ប នៅពេលនេះ គឺចាប់ផ្តើមដំណើរការចុះឈ្មោះបោះឆ្នោតនៅតាមឃុំសង្កាត់ និងណែនាំពីនិតិវិធីក្នុងការចុះឈ្មោះបោះឆ្នោត ទៅដល់ប្រជាពលរដ្ឋ។
បើតាមអ្នកនាំពាក្យ គ.ជ.ប ចំនួនពលរដ្ឋដែលនឹងត្រូវចុះឈ្មោះថ្មី អាចប៉ាន់ប្រមាណជាង ៣ សែននាក់។
ជាមួយគ្នានេះ លោកក៏សូមអំពាវនាវដល់បងប្អូនប្រជាពលរដ្ឋដែលគ្រប់អាយុ១៨ ឆ្នាំ សូមមកចុះឈ្មោះបោះឆ្នោតឲ្យបានគ្រប់ៗគ្នា ហើយអ្នកដែលមានឈ្មោះខុស ឬមិនប្រក្រតី គឺអាចទៅពិនិត្យមើលលទ្ធភាពកែប្រែបាន៕
