(ភ្នំពេញ)៖ នៅព្រឹកថ្ងៃទី១០ ខែមីនា ឆ្នាំ២០២០ ក្នុងពេលអញ្ជើញថ្លែងសុន្ទរកថា ទៅកាន់ក្រុមនិស្សិតប្រមាណជិត៣ពាន់នាក់ នៅកោះពេជ្រ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាក់ថា នាវាដឹកជញ្ជូនវត្ថុធាតុដើមសម្រាប់ផ្គត់ផ្គង់រោងចក្រនៅកម្ពុជាចំនួន៧គ្រឿង កំពុងដឹកចូលមកផែកម្ពុជាជាបន្តបន្ទាប់ហើយ ក្នុងនោះគឺមាន៥គ្រឿងបានចូលចតនៅកំពង់ផែក្រុងព្រះសីហនុហើយ និង ២គ្រឿងទៀតចតនៅកំពង់ផែវៀតណាម សម្រាប់ការផ្គត់ផ្គង់រោងចក្រនៅទីតាំងក្រុងបាវិត ខេត្តស្វាយរៀង។
ជាមួយគ្នានេះ សម្តេចតេជោ បានសុំឲ្យអាជ្ញាធរពាក់ព័ន្ធទាំងអស់ ជាពិសេស ខាងកំពង់ផែ និងគយ ត្រូវធ្វើយ៉ាងណាសម្រួលដល់ការដឹកជញ្ជូននេះឲ្យដល់រោងចក្របានឆាប់រហ័សបំផុត។
គួរបញ្ជាក់ថា បើតាមការប្រកាសរបស់ក្រសួងការងារ នៅក្នុងខេត្តមីនានេះ មានរោងចក្រប្រមាណជាជិត៣រយ បានដាក់ពាក្យស្នើសុំផ្អាកការងារផ្នែកខ្លះ ព្រោះតែខ្វះវត្ថុធាតុដើម ក្រោយពីប្រទេសចិនកំពុងជួបនូវវិបត្តិជំងឺ Covid-19 ។ យ៉ាងណាក៏ដោយ កាលពីថ្ងៃម្សិលមិញនេះ ក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៥៥ នៅខេត្តពោធិ៍សាត់ សម្តេចតេជោនាយករដ្ឋមន្រ្តីបានប្រកាសថា មិត្តចិនបានឲ្យនាវាចំនួន៧គ្រឿង ក្នុងការដឹកវត្ថុធាតុដើមសម្រាប់ផ្គត់ផ្គង់រោងចក្រមកកម្ពុជា៕