(ព្រះសីហនុ)៖ ការងារពង្រីក និងជួសជុលផ្លូវរត់ នៅអាកាសយានដ្ឋានអន្តរជាតិព្រះសីហនុត្រូវបានបញ្ចប់ជាស្ថាពរហើយ ហើយត្រូវបានរៀបចំធ្វើពិធីសូត្រមន្ត នៅថ្ងៃទី១៣ ខែតុលានេះ មុនពេលដាក់ដំណើរការជាផ្លូវការ។
ពិធីសូត្រមន្តនៅព្រឹកមិញនេះ បានធ្វើឡើងក្រោមវត្តមាន ឯកឧត្តមបណ្ឌិតឧត្តមសេនីយ៍ ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការអាកាសចរណ៍ស៊ីវិល, ឯកឧត្ដម គួច ចំរើន អភិបាលខេត្តព្រះសីហនុ និង ឯកឧត្តម លោកជំទាវ ក៏ដូចជាអាជ្ញាធរសមត្ថកិច្ចពាក់ព័ន្ធជុំវិញខេត្តជាច្រើនទៀត។
គួរបញ្ជាក់ថា ដើម្បីឆ្លើយតបទៅនឹងកំណើននៃអ្នកធ្វើដំណើរ ក្រុមហ៊ុនខេមបូឌា អ៊ែរផត ដែលគ្រប់គ្រងអាកាសយានដ្ឋានអន្តរជាតិនៅកម្ពុជា បានចំណាយថវិកាប្រមាណ ២១លានដុល្លារអាមេរិក លើការពង្រីកផ្លូវរត់នៅអាកាសយានដ្ឋានអន្តរជាតិក្រុងព្រះសីហនុ។ គម្រោងពង្រីកផ្លូវរត់នៅអាកាសយានដ្ឋានអន្តរជាតិនេះ បានចាប់ផ្តើមបើកការដ្ឋានសាងសង់កាលពីដើមឆ្នាំ២០១៩។
បន្ទាប់ពីផ្លូវរត់ថ្មីនេះដាក់ឲ្យដំណើរការ គេរំពឹងថា អាកាសយានដ្ឋានខេត្តព្រះសីហនុ នឹងមានផ្លូវរត់វែងជាងគេនៅកម្ពុជា ហើយអាចទទួលការចុះចតយន្តហោះប្រភេទធំៗ ដែលជាការឆ្លើយតបទៅនឹងកំណើនអ្នកធ្វើដំណើរ និងភ្ញៀវទេសចរអន្តរជាតិមកស្នាក់នៅកម្សាន្តក្នុងខេត្តព្រះសីហនុ៕
