(តាកែវ)៖ ប្រជាពលរដ្ឋដែលប្រើប្រាស់អគ្គិសនីរបស់សហគ្រាសអគ្គិសនីស្រុកគិរីវង់ បានសម្តែងនូវការភ្ញាក់ផ្អើល ក្រោយពីបានឃើញក្រដាសភ្លើងរបស់ពួកគាត់សម្រាប់ខែនេះ ប្រើប្រាស់ភ្លើងរហូតដល់ទៅបីដងបើធៀបនឹងខែមុនៗ ខណៈដែលភ្លើងដាច់ស្ទើរតែរាល់យប់នោះ។
បើតាមប្រជាពលរដ្ឋថា ផ្ទះរបស់គាត់ប្រើប្រាស់ភ្លើងធម្មតាដូចតែរាល់ខែសោះ ហើយក្នុងមួយយប់ៗ ភ្លើងដាច់មិនក្រោម២០ដងទេ ស្រាប់តែដល់ពេលបង់លុយ ថ្លៃភ្លើងត្រូវឡើងដល់ទៅ៣ដង ដោយខែកន្លងទៅ គាត់ចំណាយត្រឹមតែ១០ម៉ឺនរៀល តែសម្រាប់ខែនេះ ស្រាប់តែឡើងដល់ ៣០ម៉ឺនរៀល។
ដោយឡែកបើតាមមន្រ្តីប៉ូលីសម្នាក់នៅក្នុងស្រុកគីរីវង់វិញថា រាស្រ្តនៅស្រុកគីរីវង់ បច្ចុប្បន្នកំពុងរងគ្រោះខ្លាំងដោយសាររឿងភ្លើងនេះ តែបើរាស្រ្តណាហ៊ាននិយាយ គេនឹងផ្ដាច់ភ្លើងមិនឲ្យប្រើទៀតទេ ព្រោះលោកម្ចាស់ភ្លើងខាងលើគេមានអំណាចខ្លាំងណាស់ សូម្បីតែលោកក៏មិនហ៊ាននិយាយដែរ។
ពាក់ព័ន្ធករណីភ្លើងឡើងគីឡូខុសធម្មតានេះ បុគ្គលិកសហគ្រាសអគ្គិសនីស្រុកគិរីវង់បានថ្លែងថា រឿងភ្លើងឡើងថ្លៃទ្វេរមួយជាបីក្នុងខែតុលានោះ គឺមកពីពលរដ្ឋមានកម្មវិធីបុណ្យភ្ជំ ហើយផ្ទះពលរដ្ឋណាដែរអស់លុយច្រើន គឺមកពីមានបងប្អូនមកលេងច្រើន ហើយបើផ្ទះពលរដ្ឋណាប្រើអស់លុយតិច គឺមកពីមិនមានបងប្អូនមកលេង តែបើចង់បានព័ត៌មានច្បាស់ជាង គឺចាំសួរមេគេទៅ៕