(តាកែវ)៖ ករណីប្រជាពលរដ្ឋរាប់រយនាក់លើកគ្នាបិទផ្លូវជាតិលេខ២ ត្រង់ចំណុចភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ កាលពីថ្ងៃទី១៩ ខែតុលា ឆ្នាំ២០២០ ក្រោយពីអ្នកមានលុយម្នាក់បានចាក់ដីលុបប្រឡាយទឹក បណ្តាលឲ្យលិចលង់ដំណាំស្រូវរបស់ពួកគាត់នោះ ឥឡូវនេះ គេរកឃើញថា ការដែលអ្នកមានលុយរូបនោះចាក់ដីលុបប្រឡាយ ព្រោះតែក្នុងប្លង់របស់ដីនោះពុំមានបង្ហាញថាមានផ្លូវទឹក ឬជាចំណីផ្លូវនោះទេ។
តាមប្រជាពលរដ្ឋថា បញ្ហាអ្នកមានលុយចាក់ដីលុបផ្លូវទឹកនោះ គឺពួកគាត់បានតវ៉ាជាយូរមកហើយ ដោយបានដាក់ពាក្យប្ដឹងតាំងពីថ្នាក់ឃុំ ដល់ថ្នាក់ខេត្ត តែក្រុមអាជ្ញាធរហាក់មិនមានដំណោះស្រាយនោះទេ រហូតដល់ពេលនេះ មានភ្លៀងធ្លាក់ច្រើន ធ្វើឲ្យមានការជន់លិចផ្ទះស្រូវស្រែរបស់ពួកគាត់ ទើបពួកគាត់ទ្រាំលែងបាន ក៏នាំគ្នាបិទផ្លូវជាតិតែម្ដងទៅ។
ក្រោយពីមានការតវ៉ាបិទផ្លូវជាតិនេះ ទើបគេឃើញក្រុមអាជ្ញាធរចុះមកពិនិត្យមើល ហើយក៏បាននាំគ្រឿងចក្រមកកាយអាចម៏ដីដែលគេចាក់លុបផ្លូវទឹកនោះចេញ។
យ៉ាងណាក៏ដោយ ពាក់ពន្ធ័ករណីខាងលើនេះ លោក នួន សុធា ប្រធានមន្ទីរសុរិយោដី និងសំណង់ខេត្តតាកែវបានថ្លែងថា លោកបានចេញប្លង់កម្មសិទ្ធឲ្យមែន តែអ្នកយកព័ត៏មានគួរសួទៅភូមិបាលស្រុកទើបគេដឹងរឿងនេះច្បាស់ ព្រោះលោកមិនមែនជាអ្នកចុះវាស់វែងទេ៕