ក្រសួងអប់រំ យុវជន និងកីឡា បានប្រកាសនៅថ្ងៃនេះ ដោយសម្រេចអនុញ្ញាតឲ្យគ្រឹះស្ថានសិក្សាសាធារណៈទាំងអស់ បើកដំណើរការឡើងវិញក្នុងដំណាក់កាលទី៣ ចាប់ពីថ្ងៃទី០២ ខែវិច្ឆិកា រហូតដល់ដំណាច់ខែធ្នូ ឆ្នាំ២០២០។
ដោយឡែកការអនុវត្តឆមាសទី២ នៃឆ្នាំសិក្សា២០១៩-២០២០ គឺគិតចាប់ពីថ្ងៃទី០៧ ខែកញ្ញា ដល់ដំណាច់ខែធ្នូ ឆ្នាំ២០២០។
យ៉ាងណាក៏ដោយ ការបើកដំណើរការឡើងវិញនេះ ក្រសួងបានកំណត់នូវបញ្ញត្តិមួយចំនួនដូចជា សម្រាប់គ្រឹះស្ថានមតេយ្យសិក្សា និងសេវាអប់រំកុមារតូច គឺត្រូវបង្រៀន៥ថ្ងៃក្នុងមួយសប្តាហ៍ ដោយកំណត់ចំនួនកុមារមិនលើសពី២៥នាក់ក្នុងមួយថ្នាក់។
សម្រាប់គ្រឹះស្ថានបឋមសិក្សា ត្រូវអនុវត្តការបង្រៀន និងរៀនលើមុខវិជ្ជាសិក្សាគោលពីរ គឺភាសាខ្មែរ និងគណិតវិទ្យា ដោយមុខវិជ្ជាផ្សេងទៀតត្រូវព្យួរសិន ដោយនឹងត្រូវរៀនបំពេញបន្ថែមនៅដើមឆ្នាំសិក្សាបន្ទាប់ ហើយការបង្រៀន និងរៀន គឺ៣ថ្ងៃក្នុងមួយសប្តាហ៍ ដោយបែងចែកសិស្សជាពីរក្រុមក្នុងមួយថ្នាក់។
ដោយឡែកគ្រឹះស្ថានមធ្យមសិក្សា ត្រូវបង្រៀន និងរៀន ៣ថ្ងៃក្នុងមួយសប្តាហ៍ដែរ ដោយអនុវត្តការសិក្សាតាមបែបចម្រុះ ផ្តោតលើមុខវិជ្ជាសិក្សាគោលយ៉ាងតិច៦មុខវិជ្ជា ស្របតាមស្ថានភាពជាក់ស្តែង នៃចំនួនបន្ទប់រៀន និងចំនួនគ្រូ៕
