ក្រសួងសុខាភិបាលថៃ បានឲ្យដឹងថា លោក Peter Szijjarto រដ្ឋមន្រ្តីការបរទេសហុងគ្រី ត្រូវបានរកឃើញថាឆ្លងជំងឺកូវីដ១៩ នៅពេលទៅដល់ប្រទេសថៃ ដើម្បីធ្វើទស្សនកិច្ចផ្លូវការ នៅថ្ងៃទី៤ ខែវិច្ឆិកា ឆ្នាំ២០២០នេះ។
លោក Peter Szijjarto និងសមាជិកគណៈប្រតិភូរបស់លោកចំនួន១២នាក់ ត្រូវបានធ្វើតេស្តសុខភាព ក្រោយចាកចេញពីកម្ពុជា ប៉ុន្តែមានតែលោករដ្ឋមន្រ្តីរូបនេះប៉ុណ្ណោះដែលរកឃើញថាឆ្លងកូវីដ១៩។
លោក Peter Szijjarto មានវ័យ៤២ឆ្នាំ ត្រូវបានបញ្ជូនទៅកាន់វិទ្យាស្ថានជំងឺឆ្លង Bamrasnaradura ដើម្បីព្យាបាល។ លោក និងគណៈប្រតិភូ នឹងត្រូវបានបញ្ជូនទៅប្រទេសហុងគ្រីវិញ តាមជើងហោះហើរដាច់ដោយឡែកពីគ្នា។
បើតាមសារព័ត៌មាន MTI របស់ហុងគ្រី ឲ្យដឹងថា លោក Peter Szijjarto បានធ្វើតេស្តរកកូវីដ១៩ មុនចេញដំណើរទស្សនកិច្ចមកកាន់តំបន់អាស៊ីដែរ ប៉ុន្តែលទ្ធផលអវិជ្ជមាន កាលពីចុងខែមុន។
សូមបញ្ជាក់ដែរថា លោក Peter Szijjarto បានមកបំពេញទស្សនកិច្ចផ្លូវការនៅកម្ពុជា កាលពីថ្ងៃទី៣ ខែវិច្ឆិកា ឆ្នាំ២០២០។ ក្នុងនោះលោកបានជួបជាមួយសម្តេច ហ៊ុន សែន និងមន្រ្តីជាន់ខ្ពស់កម្ពុជាមួយចំនួនផងដែរ៕
