(កែប)៖ យោងតាមគណនីហ្វេសប៊ុកមួយឈ្មោះ «Jëë Mēÿ» បានបង្ហោះសារជេរប្រមាថ ដោយថា លោក សោម ពិសិដ្ឋ អភិបាលខេត្តកែប ដែលទើបឡើងកាន់តំណែង បានផ្ញើសារមកនាង ដោយសុំនាងធ្វើប្រពន្ធចុងត្រង់ៗតែម្តង។
ក្រោយការផ្ញើសារនោះ គណនីហ្វេសប៊ុក «Jëë Mēÿ» បានបង្ហោះសារនៅរសៀលថ្ងៃទី៦ ខែវិច្ឆិកា ឆ្នាំ២០២០ នេះដោយពាក្យអសុរសថា «នៅមានមនុស្សបែបហ្នឹងប៉ុន្មាននាក់ទៀតដល់ថ្នាក់ធ្វើដល់អភិបាលខេត្តកែប ហើយតែនៅតែល្មោភស្រីមិនឈប់សោះ នៅមុខមនុស្សច្រើនធ្វើចរឹកសុភាពរាបសាណាស់តែ…»។
ជុំវិញបញ្ហានេះ លោក សោម ពិសិដ្ឋ អភិបាលខេត្តកែប ថ្លែងប្រាប់ ANN ថា លោកមិនបានប្រព្រឹត្តដូចការចោទប្រកាន់នោះទេ, ហើយថា ហ្វេសប៊ុករបស់លោកនៅប្រើប្រាស់ ដោយលោកសន្និដ្ឋាន ថា អាចមានជម្លោះគូភាគីណាមួយ ហើយមានបញ្ហាផ្ទាល់ខ្លួន។
លោកបន្តថា រឿងនេះ ធ្លាប់កើតឡើងម្តងមកហើយ កាលពីឆ្នាំមុន ឥឡូវទើបឡើងមកម្តងទៀត ដោយមិនដឹងមានហេតុផល ផ្ទៃក្នុងអ្វីទេ។
យ៉ាងណាក៏ដោយ លោក សោម ពិសិដ្ឋ បានបញ្ជាក់ថា លោកកំពុងធ្វើពាក្យបណ្តឹងទៅក្រសួងមហាផ្ទៃ និង អគ្គស្នងការដ្ឋាននគរបាលជាតិ ដើម្បីស្រាវជ្រាវករណីនេះហើយ៕