(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបញ្ជាក់ថា នៅថ្ងៃទី៩ វិច្ឆិកា នេះ ក្រុមគ្រូពេទ្យបានយកសំណាករបស់សម្តេច និងភរិយាព្រមទាំងអ្នកនៅជាមួយនិងអ្នកនៅជាប់សម្តេចទាំងអស់ទៅធ្វើតេស្តជាលើកទី២ ហើយលទ្ធផលគឺអវិជ្ជមានទាំងអស់ ដែលវាគឺជាលទ្ធផលល្អសម្រាប់ដំណាក់កាលទី២ក្នុងចំណោម៤ដំណាក់កាល។
យ៉ាងណាក៏ដោយ សម្តេចបញ្ជាក់ថា សម្តេចត្រូវធ្វើចត្តាឡីស័កបន្តទៀត និងរង់ចាំការធ្វើតេស្តជាលើកទី៣នៅថ្ងៃទី១៤ វិច្ឆិកា និងលើកទី៤នៅថ្ងៃទី១៨វិច្ឆិកា។
ក្នុងនោះដែរ សម្តេចក៏បានដាក់ឈ្មោះព្រឹត្តិការណ៍ ដែលមានមនុស្សត្រូវធ្វើតេស្តកូវីដ១៩ រហូតដល់៩០០នាក់នេះថា គឺជា «ព្រឹត្តិការណ៍៣វិច្ឆិកា» ហើយសម្តេចរំពឹងថា ព្រឹត្តិការណ៍នេះនឹងត្រូវបិទបញ្ចប់នៅក្រោយពេលដែលមនុស្សប្រមាណ៩០០នាក់ដឹងថា វិជ្ជមាន ឬអវិជ្ជមានដែលត្រូវការពេលប្រមាណ៣សប្តាហ៍ទៀត។
ជាមួយគ្នានេះដែរ សម្តេចតេជោ ក៏បានចេញបទបញ្ជាឲ្យក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាលពិនិត្យតាមដានគ្រប់មនុស្សដែលបាននិងកំពុងធ្វើចត្តាឡីស័ក ប្រសិនពួកគាត់អនុវត្តមិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័កតាមទីកន្លែងដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាលឬកងរាជអាវុធហត្ថអោយបានហ្មត់ចត់។
សម្តេចតេជោបានបញ្ជាក់ថា នេះគឺជាគន្លឹះក្នុងការឈានទៅបញ្ចប់ព្រឹត្តិការណ៍៣វិច្ឆិកាឲ្យបានឆាប់តាមរយៈកុំឲ្យកើនចំនួនមនុស្សពាក់ព័ន្ធដែលនាំដល់អូសពេលវេលាកាន់តែវែង។
«សូមកុំឱ្យកំទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់យើង សូមជួយពន្លត់ភ្លើង និង សុំកុំអង្គុយបក់ផ្សែង។ ព្រឹត្តិការណ៍៣វិច្ឆិកានឹងបញ្ចប់ក្នុងខែវិច្ឆកានេះ ដែលមិនត្រូវពន្យាពេល»៕