(កណ្តាល)៖ ចាប់តាំងពីរសៀល រហូតដល់ល្ងាចថ្ងៃទី១០ វិច្ឆិកានេះ កម្លាំងសមត្ថកិច្ចខេត្តកណ្តាល ដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានកំពុងឡោមព័ទ្ធជនសង្ស័យជាមេខ្លោងគ្រឿងញៀន នៅចំណុចភូមិថ្កុល ឃុំត្រើយស្លា ស្រុកស្អាង ខេត្តកណ្តាល។
បើតាមសេចក្តីរាយការណ៍ថា ក្រោយការឡោមព័ទ្ធនោះ ជនសង្ស័យបានផ្ទុះអាវុធចំនួន៣គ្រាប់ហើយ ដោយដំបូងជនសង្ស័យបានបាញ់សំដៅមួយគ្រាប់ មកលើសមត្ថកិច្ច បន្ទាប់មករយៈពេលប្រមាណជាង១ម៉ោង ក្រោយមក ជនសង្ស័យបន្តបាញ់សំដៅមកលើសមត្ថកិច្ចចំនួន២គ្រាប់ទៀត ដើម្បីគំរាមសមត្ថកិច្ច នឹងព្យាយាមគេចខ្លួន ចាកចេញពីកន្លែងដែលគេកំពុងលាក់ខ្លួន។
យ៉ាងណាក៏ដោយ ពេលនេះ ស្នងការនគរបាលខេត្តកណ្ដាល បានបញ្ជាឲ្យកម្លាំងមានការប្រុងប្រយ័ត្នខ្ពស់ ទៅតាមវិធានការបច្ចេកទេសជំនាញ ដើម្បីឃាត់ខ្លួនសង្ស័យយកមកផ្ដន្ទាទោស និងគ្រប់គ្រងស្ថានការណ៍ឲ្យបានដើម្បីបញ្ចៀសគ្រោះថ្នាក់ពីការបាញ់ប្រហារដោយជនសង្ស័យ៕
