(កណ្តាល)៖ សេចក្តីរាយការណ៍បានឲ្យដឹងថា ជនសង្ស័យជាមេក្លោងគ្រឿងញៀន ដែលសមត្ថកិច្ចព័ទ្ធកាលពីល្ងាចថ្ងៃទី១០ វិច្ឆិកា ម្សិលមិញ នៅចំណុចភូមិថ្កុល ឃុំត្រើយស្លា ស្រុកស្អាង ខេត្តកណ្តាលនោះ ឥឡូវនេះសមត្ថកិច្ចចាប់បានហើយ ក្រោយពីជនសង្ស័យបានបាញ់សន្ធាប់មកលើសមត្ថកិច្ចអស់ប្រមាណជាង១០គ្រាប់ ហើយសមត្ថកិច្ចបានបាញ់តវិញបណ្តាលឲ្យបាក់ជើង។
ការបាញ់តគ្នាលើកចុងក្រោយ មុននឹងឈានដល់ការចាប់ខ្លួនជនសង្ស័យនេះ គឺបានធ្វើឡើងនៅវេលាម៉ោងប្រមាណ ២រំលងអធ្រាត្រឈានចូលថ្ងៃទី១១ ខែវិច្ឆិកា ឆ្នាំ២០២០។
តាមលោក ពុយ ទ្រី នាយប៉ុស្តិ៍ត្រើយស្លា ដែលថ្លែងប្រាប់សារព័ត៌មានក្នុងស្រុកបានឲ្យដឹងថា មុននឹងសមត្ថកិច្ចឈានដល់ការចាប់ខ្លួនជនសង្ស័យនោះ គឺជនសង្ស័យបានបាញ់មកលើសមត្ថកិច្ចជាង១០គ្រាប់ ទើបសមត្ថកិច្ចបានបាញ់ត្រូវជើងឆ្វេងជនសង្ស័យមួយគ្រាប់ ។
បច្ចុប្បន្នជនសង្ស័យត្រូវបានបញ្ជូនទៅមន្ទីរពេទ្យជ័យជំនះ ក្រុងតាខ្មៅ ដើម្បីព្យាបាល និង បន្តនីតិវិធី៕
