(តាកែវ)៖ ប្រជាពលរដ្ឋរស់នៅក្បែរវត្តក្រាំងស្លែង ក្នុងឃុំត្រពាំងសាប ដែលបានដឹងលឺពីទីតាំងល្បែងអាប៉ោង និងជល់មាន់ដែលនៅកៀកនឹងប៉ុស្តិ៍នគរបាលឃុំត្រពាំងសាប បានសម្តែងនូវការហួសចិត្ត ក្រោយពីបានឃើញរបាយការណ៍របស់លោក វរសេនីយ៍ទោ ឆាយ កែវមុន្នី អធិការនគរបាលស្រុកបាទី ផ្ញើទៅកាន់លោកស្នងការនគរបាលខេត្តតាកែវ ព្រោះថា ទីតាំងជល់មាន់នោះ គឺនៅខាងក្រោយប៉ុស្តិ៍នគរបាលឃុំត្រពាំងសាបតែប៉ុន្មានរយម៉ែត្រប៉ុណ្ណោះ តែបែរជាលោក ឆាយ កែវមុន្នី ទៅចាប់ម្ចាស់តារាងបាល់ដែលនៅចម្ងាយប្រមាណ២គីឡូម៉ែត្រឲ្យមកធ្វើកិច្ចសន្យា ហើយថា ការផ្សាយរបស់សារព័ត៌មានគឺជារឿងមិនពិតទៅវិញ។
បើតាមការបញ្ជាក់របស់ប្រជាពលរដ្ឋ ក៏ដូចជាលោក ឡេង វណ្ណា នាយប៉ុស្តិ៍រដ្ឋបាលឃុំត្រពាំងសាបផ្ទាល់បានទទួលស្គាល់ថា ទីតាំងល្បែងនោះ គឺស្ថិតនៅខាងក្រោយប៉ុស្តិ៍ ដែលមានម្ចាស់ឈ្មោះ យ៉ត បានបើកលេងរាប់ឆ្នាំមកហើយ ហើយអ្នកណាក៏ដឹងដែរថា ទីនោះមានការលេងចាក់ភ្នាល់លុយរាប់ពាន់ដុល្លារ ហើយអ្នកដែលមកលេងទៀតសោត ក៏មានទាំងមន្រ្តី ក៏ដូចជាអ្នកមានលុយ មានអំណាចផងដែរ, តែបើងាកមកមើលរបាយការណ៍របស់លោក ឆាយ កែវមុន្នី អធិការនគរបាលស្រុកបាទី ដែលមានកម្រាស់២ទំព័រ ផ្ញើទៅលោក សុខ សំណាង ស្នងការនគរបាលខេត្តតាកែវវិញ បានលើកឡើងថា ទីតាំងនោះ ស្ថិតនៅភូមិស្តុកប្រិយ៍ ចម្ងាយប្រមាណ២គីឡូម៉ែត្រពីប៉ុស្តិ៍រដ្ឋបាលឃុំត្រពាំងសាប មានម្ចាស់ឈ្មោះ ស អួក ភេទស្រី អាយុ៦៨ឆ្នាំ ដោយគេលេងជល់មាន់១គូរ ឬ២គូរ ម្តងម្កាលប៉ុណ្ណោះ។
ប្រជាពលរដ្ឋបាននិយាយថា ពួកគាត់ពិតជាហួសចិត្តមែនទែន មិនដឹងថា លោកអធិការស្រុកបាទីថ្មីខ្លាចបារមីរបស់ម្ចាស់សង្វៀនឈ្មោះ យ៉ត នោះ ឬយ៉ាងណាទេបានជាមើលមិនឃើញ ហើយបែរជាហៅម្ចាស់តារាងបាល់ដែលគាត់មិនដឹងអី ឲ្យមកធ្វើកិច្ចសន្យាហើយធ្វើរបាយការណ៍ទៅថ្នាក់លើនោះ៕
អត្ថបទ៖ នាងខ្មៅ
