កណ្ដាល៖ ប្រជាពលរដ្ឋរស់នៅភូមិកណ្តាល ឃុំព្រែកអញ្ចាញ ស្រុកមុខកំពូល ប្រមាណជាជិត១រយនាក់ កាលពីពេលថ្មីៗនេះ បាននាំគ្នាផ្ដិតមេដៃ ស្នើឲ្យអាជ្ញាធរជួយអន្តរាគមន៍ ក្រោយពីរោងចក្រផលិតបារី ដែលគ្មានស្លាកយីហោមួយកន្លែង នៅក្នុងរោងចក្រ SK (អតីតរោងចក្រក្ដាបន្ទះ) ជារបស់លោកជំទាវ សេង គាង ស្ថិតនៅ ភូមិកណ្ដាល ស្រុកមុខកំពូល ខេត្តកណ្តាល បានជះក្លិនថ្នាំសាយភាយចេញមកខាងក្រៅ បង្កការប៉ះពាល់សុខភាព នឹងការរស់នៅរបស់ប្រជាពលរដ្ឋ។
អាជ្ញាធរចុះណែនាំម្ចាស់រោងចក្រផលិតបារី
ប្រជាពលរដ្ឋបានរៀបរាប់នៅក្នុងពាក្យបណ្តឹងថា «យើងខ្ញុំជាប្រជាពលរដ្ឋ នៅភូមិកណ្ដាល ឃុំព្រែកអញ្ចាញ ស្រុកមុខកំពូល ខេត្តកណ្ដាល សុំអាជ្ញាធរមូលដ្ឋាន ជួយដោះស្រាយបញ្ហា រោងចក្រផលិតបារី មួយកន្លែង នៅភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល ដែលធ្វើឲ្យជះក្លិនសាយភាយ ពេលលាយមេបារី ដែលធ្វើឲ្យប៉ះពាល់យ៉ាងខ្លាំង ដល់ផ្លូវដង្ហើមកុមារ មនុស្សចាស់ ស្ត្រីមានផ្ទៃពោះ នឹងស្ត្រីទើបឆ្លងទន្លេ ។ អាស្រ័យហេតុដូចនេះ សូមអាជ្ញាធរ ឃុំ ស្រុក នឹងមន្ត្រីបរិស្ថាន ប្រចាំស្រុកមុខកំពូល ពិនិត្យមើលរោងចក្រ ផលិតបារីមួយកន្លែងនេះ ធ្វើយ៉ាងណាកំឲ្យមានក្លិន សាយភាយមកខាងក្រៅឲ្យសោះ»។
ក្រោយពីមានការប្តឹងផ្តល់របស់ប្រជាពលរដ្ឋនេះ កាលពីថ្ងៃទី១២ ខែវិច្ឆិកា ឆ្នាំ២០២០ កន្លងទៅ គេឃើញកម្លាំងប៉ុស្ដិ៍ នគរបាលរដ្ឋបាលព្រែកអញ្ចាញ សហការជាមួយមន្ទីរបរិស្ថានខេត្តកណ្ដាល និងការិយាល័យពាក់ព័ន្ធ បានចុះធ្វើការពិនិត្យ ហើយនៅពេលនោះ ម្ចាស់សិប្បកម្មបានសុំពេល ៣ថ្ងៃ ដើម្បីកែសម្រួល ក៍ប៉ុន្ដែរហូតមកដល់ថ្ងៃទី ១៦ ខែវិច្ឆិកា នេះ ប្រជាពលរដ្ឋនៅតែត្អូញត្អែរថា ក្លិនបារីពីរោងចក្រនោះ នៅតែជះសាយភាយមកលើពួកគាត់ ហើយកាន់តែខ្លាំងជាងមុនទៅទៀត៕
