ភ្នំពេញ៖ កាលពីវេលាម៉ោងប្រមាណជា១១ថ្ងៃត្រង់ ថ្ងៃទី១៧ ខែវិច្ឆិកា ឆ្នាំ២០២០នេះ មានគ្រោះថ្នាក់ចរាចរណ៍ដ៏រន្ធត់មួយបានកើតឡើងនៅតាមបណ្តោយផ្លូវហាណូយ ចំណុចភូមិត្រពាំងស្វាយ សង្កាត់គោកឃ្លាង ខណ្ឌសែនសុខ ក្រោយពីរថយន្តដឹកហ្គាសមួយគ្រឿងបានបុករះម៉ុតូ៥គ្រឿង និងរថយន្តមួយគ្រឿងដែលកំពុងចាំភ្លើងស្តុប បណ្តាលឲ្យស្លាប់បុរសម្នាក់នៅនឹងកន្លែង ព្រមទាំងស្រ្តីពោះធំ២នាក់ទៀតរងរបួសធ្ងន់។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ រថយន្តបង្កម៉ាកហ៊ីយាន់ដាយ ពណ៌ស ពាក់ស្លាកលេខ ភ្នំពេញ 3E-4913 ។ជារថយន្តដឹកហ្គាស បើកបរតាមបណ្តោយ ផ្លូវហាណូយ ពីទិសខាងជើង ទៅខាងត្បូង លុះដល់ចំណុចកើតហេតុ ជ្រុលទៅបុកពីក្រោយរថយន្តតូយ៉ូតា ព្រុស ពណ៌ខៀវ ពាក់ផ្លាកលេខ ភ្នំពេញ 2BI-0032 រុញផ្ទប់នឹងម៉ូតូរ៉ឺម៉ក កំពុងឈប់ភ្លើងស្តុបនិងបន្តទៅបុករះម៉ូតូរ៉ឺម៉កដឹកកញ្ចក់ ម៉ូតូលក់ពោតស្ងោរ ម៉ូតូលក់លៀសហាល ម៉ូតូលក់គ្រឿងម្ជូរ ដែលចតលក់នៅចិញ្ចើមផ្លូវ បណ្តាលឲ្យស្ត្រីពោះធំ ជាកម្មការិនី រោងចក្រ ពីរនាក់ រងរបួសធ្ងន់ ហើយអ្នករងរបួសនោះ ត្រូវបានដឹកបញ្ជូន ទៅមន្ទីរពេទ្យភ្លាមៗ ចំណែកអ្នកបើកបរម៉ូតូរ៉ឺម៉កដឹកកញ្ចក់ ស្លាប់ភ្លាមៗ នៅនឹងកន្លែងតែម្តង។
ក្រោយពេលកើតហេតុភ្លាម សមត្ថកិច្ចប្រចាំគោលដៅ ២៤ម៉ោង ក្បែរនោះ បានឃាត់ខ្លួន អ្នកបើកបរ រថយន្តបង្ក យកទៅការិយាល័យចរាចរណ៍ជើងគោក នៃស្នងការដ្ឋាននគរបាល រាជធានីភ្នំពេញ ដើម្បីកសាងសំណុំរឿង តាមនីតិវិធី៕