អន្តរជាតិ៖ តាមតួលេខពីគេទំព័រអន្តរជាតិ Worldometer បានបង្ហាញថា គិតត្រឹមម៉ោង៦ និង៣០នាទីព្រឹក ថ្ងៃទី១៩ ខែវិច្ឆិកា ឆ្នាំ២០២០នេះ អ្នកឆ្លងវីរុសកូវីដ១៩ នៅទូទាំងពិភពលោក បានកើនឡើងដល់៥៦,៥២២,៤១៩ករណីហើយ ដោយក្នុងនោះមនុស្សសរុប ១,៣៥៣,៦៧៤នាក់បានស្លាប់ដោយសារជំងឺនេះ និងជាង ៣៩លាននាក់ បានជាសះស្បើយ។
ត្រឹមតែរយៈពេល២៤ម៉ោង ពិភពលោកទាំងមូលរកឃើញអ្នកឆ្លងសរុប ៥៨២,៩៤៧ករណី។
អ្នកជំងឺកូវីដ១៩ម្នាក់ ត្រូវបញ្ជូនទៅកន្លែងសង្រ្គោះនៅទីក្រុងញូយ៉ក
គួរបញ្ជាក់ដែរថា ក្នុងចំណោមករណីឆ្លងទាំងជាង ៥៥លាននាក់ខាងលើ សហរដ្ឋអាមេរិក ឈរនៅកំពូលតារាង ដែលគិតត្រឹមព្រឹកនេះអាមេរិកមានអ្នកឆ្លងសរុប ១១,៨៥៤,៧៥៥នាក់ និងជាង ២៥ម៉ឺននាក់ស្លាប់។ ចំណែកឯព្រឹកនេះ សហរដ្ឋអាមេរិក បានរកឃើញករណីឆ្លងថ្មីសរុប ១៥៤,៦៦០នាក់ និងអ្នកជំងឺសរុប ១,៧៧៨នាក់ បានស្លាប់៕
