ភ្នំពេញ៖ កាលពីរសៀល ថ្ងៃទី១៩ ខែវិច្ឆិកា ឆ្នាំ២០២០ លោក សុខ ពេញវុធ អភិបាលខណ្ឌដូនពេញ បានអញ្ជើញដឹកនាំកិច្ចប្រជុំណែនាំ និងផ្សព្វផ្សាយដល់ក្រុមការងារកំណត់និមិត្តសញ្ញារបស់រដ្ឋបាលសង្កាត់ទាំង១១ នៃខណ្ឌដូនពេញ ដើម្បីពិនិត្យ និងអនុម័ត កែសម្រួល ដាក់ជូនរដ្ឋបាលរាជធានីភ្នំពេញ និង ក្រសួងមហាផ្ទៃ តាមឋានានុក្រម នឹងដាក់ឲ្យប្រើប្រាស់ជាផ្លូវការ តាមគោលការណ៍របស់ រាជរដ្ឋាភិបាល ក៏ដូចជារដ្ឋបាលរាជធានីភ្នំពេញ។
សូមបញ្ជាក់ថា ការកំណត់និមិត្តសញ្ញាសម្រាប់ស្រុក ខណ្ឌ និងឃុំសង្កាត់នេះ ត្រូវបានណែនាំដោយក្រសួងមហាផ្ទៃកាលពីពាក់កណ្តាលឆ្នាំនេះ ដោយក្នុងនោះ ការកំណត់និមិត្តសញ្ញារបស់រដ្ឋបាលក្រុង ស្រុក ខណ្ឌ និងរដ្ឋបាល ឃុំ សង្កាត់ ត្រូវផ្អែកលើគោលការណ៍ មួយចំនួន ដូចជា ត្រូវសិក្សាស្រាវជ្រាវអំពីប្រវត្តិ នៃការកកើត ក្រុង ស្រុក ខណ្ឌ ឃុំ សង្កាត់ អត្តសញ្ញាណជាប្រវត្តិសាស្ដ្រ វប្បធម៌ ប្រពៃណី ការអភិវឌ្ឍ និងកត្តាសំខាន់ដទៃផ្សេង ទៀត ដែលជាលក្ខណៈពិសេសនៃរដ្ឋបាល នីមួយៗ៕