ព្រះសីហនុ៖ កាលពីល្ងាចថ្ងៃទី១៩ ខែវិច្ឆិកា ឆ្នាំ២០២០ម្សិលមិញ លោក ម៉ាង ស៊ីណេត អភិបាលរងខេត្តព្រះសីហនុ តំណាងឲ្យលោក គួច ចំរើន អភិបាលខេត្តព្រះសីហនុ និងលោកឧកញ៉ា ទៀ វិចិត្រ បានចុះពិនិត្យមើលសមិទ្ធផលនៅសាលាបឋមសិក្សាអូរត្រេះ ស្ថិតនៅភូមិ៦ សង្កាត់លេខ៤ ក្រុងព្រះសីហនុ ព្រមទាំងបានឧបត្ថម្ភបង្ហើយការចាក់សាបផ្លូវចូលសាលា និងទីធ្លាមួយចំនួនដែលនៅសេសសល់។
ឆ្លៀតឱកាសនោះ លោក ម៉ាង សុីណេត អភិបាលរងខេត្តព្រះសីហនុ ក៏បានជួបពិភាក្សាជាមួយលោកនាយកសាលា លោកគ្រូ អ្នកគ្រូ ចំពោះបញ្ហាដែលសាលាមានការខ្វះខាត និងធ្វើការជួសជុលបន្ថែមនៅចំណុចកន្លែងដែលខូចខាត ងាយស្រួលដល់សិស្សានុសិស្សដែលមករៀនមានភាពងាយស្រួលផងដែរ។
លោក សៅ ចាន់ធឿន នាយកសាលាបឋមសិក្សាអូរត្រេះចាស់ ព្រមទាំងលោកគ្រូអ្នកគ្រូ បានថ្លៃអំណរអរគុណ ដល់ លោក គួច ចំរើន អភិបាលខេត្តព្រះសីហនុ ព្រមទាំងលោកអភិបាលរងខេត្ត និងលោកឧកញ៉ា ទៀ វិចិត្រដែលបាននាំយកអំណោយនៅស៊ីមងត៍និងខ្សាច់ ដើម្បីជួយសាលារៀនបឋមសិក្សាអូរត្រេះចាស់ ក្នុងការចាក់សាបទីធ្លាបរិវេណសាលារៀន ឱ្យមានភាពងាយស្រួលក្នុងការធ្វើដំណើរ និងគោរពទង់ជាតិ៕