សៀមរាប៖អ្នកនាំពាក្យក្រសួងបរិស្ថានថា ក្នុងមួយឆ្នាំៗកម្ពុជា បង្កើតសំរាមបាន៤លានតោន។
គ្មានអ្នកណាចូលចិត្តសំរាមទេ.. ដូច្នេះយើងត្រូវតែរួមគ្នា ទុកដាក់សំរាមឲ្យបានត្រឹមត្រូវ
លោក នេត្រ ភក្ត្រា បានថ្លែងនៅថ្ងៃទី២២ ខែវិច្ឆិកា ឆ្នាំ២០២០នេះ ក្នុងទិវាអនាម័យបរិស្ថាន ២៣ វិច្ឆិកា និងពិធីបុណ្យទន្លេសាបនារដូវទឹកសម្រកប្រចាំឆ្នាំ២០២០ ឯឃុំកំពង់ឃ្លាំង ស្រុក សូទ្រនិគម ខេត្តសៀមរាប ថា «ក្នុងមួយឆ្នាំៗ កម្ពុជាបានបង្កើតសំរាមប្រមាណ ៤លានតោន ក្នុងនោះ៦៥% ជាសំណល់សិរីរាង្គ ប្រមាណ២០% ជាសំណល់ប្លាស្ទិក នៅសេសសល់ជាសំណល់រឹង និងសំណល់ផ្សេងៗទៀត។ ក្នុងចំណោមសំរាមទាំងអស់នោះ មានត្រឹមតែប្រមាណ ៥១% ប៉ុណ្ណោះ ដែលត្រូវបានយកទៅចាក់នៅទីលានចាក់សំរាម ក្រៅនោះត្រូវគេបោះចោលយ៉ាងអនាធិបតេយ្យតាមដងផ្លូវ ក្នុងព្រៃប្រភពទឹក និងខ្លះទៀតត្រូវបានដុតចោលជាដើម»។
យ៉ាងណាក៍ដោយលោកថា កម្ពុជាមិនទាន់មានតួលេខថា ក្នុងមួយឆ្នាំប្រើប្រាស់ប្លាស្ទិកអស់ប៉ុន្មានតោននៅឡើយ ប៉ុន្តែគ្រាន់តែនៅរាជធានីភ្នំពេញ ក្នុងមួយថ្ងៃថង់ប្លាស្ទិកមានជាង ១០លានថង់ ត្រូវបានប្រើប្រាស់៕
