ភ្នំពេញ – នៅថ្ងៃទី២៤ និង២៥ ខែវិច្ឆិកា ឆ្នាំ២០២០ លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា នឹងចូលរួមក្នុងសន្និសីទថ្នាក់រដ្ឋមន្រ្តីហ្រ្វង់កូហ្វូនី លើកទី៣៧ (CMF) នៅទីក្រុងប៉ារីស តាមប្រព័ន្ធវីដេអូ។
លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា
កិច្ចប្រជុំនោះ រដ្ឋមន្រ្តី និងប្រធានគណៈប្រតិភូទាំងអស់ នឹងពិនិត្យមើលលើយុទ្ធសាស្រ្តសេដ្ឋកិច្ចសម្រាប់អង្គការ OIF ដំណើរការនៃការកែទម្រង់ ការអនុវត្តគម្រោង និងសកម្មភាពរបស់អង្គការ OIF ព្រមទាំងផ្លាស់ប្តូរទស្សនៈលើបញ្ហាប្រឈម និងបញ្ហាសេដ្ឋកិច្ចសង្គម ដែលអង្គការ OIF និងពិភពលោកកំពុងជួបប្រទះ ជាពិសេសក្នុងបរិបទ នៃវិបត្តិជំងឺកូវីដ១៩ នាពេលបច្ចុប្បន្ន។
សូមបញ្ជាក់ថា ព្រះករុណា ព្រះនរោត្តម សីហនុ ព្រះបរមរតនកោដ្ឋ គឺជាបិតាស្ថាបនិក១រូប នៃចលនាហ្រ្វង់កូហ្វូន និងជាមេដឹកនាំលេចធ្លោជាងគេ នៃចលនានេះនៅអាស៊ី។ បច្ចុប្បន្ន អង្គការអន្តរជាតិហ្រ្វង់កូហ្វូនី មានរដ្ឋ និងរដ្ឋាភិបាលសមាជិកចំនួន ៨៨៕
