ក្នុងសារជាសំឡេងកាលពីយប់មិញ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជាបានប្រកាសថា ការចម្លងវីរុសកូវីដ១៩ក្នុងសហគមន៍លើកដំបូងនៅកម្ពុជាចាប់ផ្តើមហើយ ក្រោយពីគេបានរកឃើញស្រ្តីម្នាក់ជាប្រពន្ធរបស់ប្រធានអគ្គនាយកពន្ធនាគារមានវិជ្ជមានវីរុសកូវីដ១៩។
តាមរយៈសារសំឡេងនេះ សម្តេចតេជោក៏បានណែនាំដល់អ្នកពាក់ព័ន្ធទាំងអស់ត្រូវធ្វើចត្តាឡីស័ក ដែលក្នុងនោះក៏រួមមានទាំង សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោកឧបនាយករដ្ឋមន្ត្រី ប៊ិន ឈិន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក កើត រិទ្ធ រដ្ឋមន្ត្រីក្រសួងយុត្តិធម៌ និងមន្ត្រីពាក់ព័ន្ធជាច្រើនរូបទៀត។
យ៉ាងណាក៏ដោយ សម្តេចតេជោក៏បានស្នើដល់ប្រជាពលរដ្ឋមេត្តាកុំមានការស្លន់ស្លោ ឬឆោឡោរហូតបាត់បង់ការគ្រប់គ្រង តែត្រូវបង្កើនការយកចិត្តទុកដាក់ពាក់ព័ន្ធការការពារខ្លួនតាមរយៈការពាក់ម៉ាស់ ការលាងដៃ ការអនាម័យតាមការណែនាំរបស់ក្រសួងសុខាភិបាល។
ពាក់ព័ន្ធនឹងករណីប្រពន្ធរបស់អគ្គនាយកពន្ធនាគារត្រូវរកឃើញវិជ្ជមានវីរុសកូវីដ១៩នេះ បើតាមមន្រ្តីជាន់ខ្ពស់ក្រសួងសុខាភិបាលបានឲ្យដឹងថា គិតត្រឹមយប់មិញ គេបានរកឃើញមនុស្សសរុបចំនួន ៦នាក់ហើយ ក្នុងនោះរួមមាន លោក ឆែម សាវុធ អគ្គនាយកពន្ធនាគារ, ប្រពន្ធរបស់គាត់ ព្រមទាំងមនុស្ស៤នាក់ផ្សេងទៀត។
ជាវិធានការបន្ទាន់ ក្រសួងក៏បានសម្រេចបិទផ្សារអ៊ីអន១ ដែលអ្នកវិជ្ជមានវីរុសកូវីដ១៩បានទៅទីនោះ ព្រមទាំងទីតាំងមួយចំនួនទៀត៕
