អាចចាត់ទុកបានថា វាគឺជាវាសនា ដែលតម្រូវឲ្យបុរសដែលពិកាភ្នែក បានជួបជាមួយនឹងស្រ្តីមានសតិមិនគ្រប់ ហើយត្រូវផ្សំផ្គុំជាស្វាមីភរិយា រហូតបង្កើតបានកូនមួយជាចំណងដៃ ហើយទោះស្ថិតក្នុងស្ថានភាពក្រលំបាកយ៉ាងណា ក៏ពួកគេខិតខំតស៊ូក្នុងជីវិតដែរ។
ប្ដីប្រពន្ធមួយគូរខាងលើនេះ រស់នៅក្នុងភូមិថ្លុកដូនទុំ ឃុំបានកាម ស្រុកព្រៃកប្បាស ខេត្តតាកែវ ដោយប្ដីឈ្មោះ មុត ថា អាយុ៤០ឆ្នាំ រីឯប្រពន្ធឈ្មោះ យឿ វ៉ា អាយុ៣០ឆ្នាំ និងមានកូនស្រីម្នាក់អាយុ៨ឆ្នាំ ហើយបច្ចុប្បន្នគេរៀនបានថ្នាក់ទី៣ហើយ។
បើតាមការរៀបរាប់ពីលោក មុត ថា ដែលជាប្ដីពិការភ្នែកបានឲ្យដឹងថា លោកមានតែម្ដាយជរាម្នាក់ឈ្មោះឈឹង ម៉ិអាយុ៧៥ឆ្នាំដោយឪពុករបស់លោកបានស្លាប់ជាយូណាស់មកហើយ លោកបានបន្តថាលោកមានបងប្អូនចំនួន៦នាក់ប្រុស៣ស្រី៣លោកជាកូនទី៥។
លោក មុត ថា បាននិយាយថា លោកពិតជាពិបាករស់មែនទែនដោយភ្នែកទាំងគូររបស់គាត់មើលឃើញប្រហែល១០ភាគរយទេហើយលោកដើរធ្វើការជាកម្មករលីបាវស្រូវ, និយាយអោយខ្លីគឺលោកស៊ីឈ្នួលគេដោយប្រើកំលាំងសុទ្ធ។ អ្វីដែលលោកធ្វើទៅបានមិនមែនប្រើភ្នែកទាំងស្រុងទេគឺលោកប្រើវិញ្ញាណខ្លះក្នុងការដឹងអំពីផ្លូវដើរឬផ្លូវទៅកន្លែងស៊ីឈ្នួលគេនិងផ្លូវត្រូវទៅផ្ទះ។
សម្រាប់ជីវិតគូរស្រករវិញ លោកថា នៅឆ្នាំ២០១០លោកមានអាយុ៣០ឆ្នាំត្រូវបានបងប្អូនឪពុកម្ដាយនាំទៅស្ដីដណ្ដឹងស្រ្តីម្នាក់ឈ្មោះយឿ វ៉ាមានអាយុ២០ឆ្នាំរស់នៅភូមិសំរោងម្រះ ឃុំបានកាម ស្រុកព្រៃកប្បាស ខេត្តតាកែវ។ បើទោះជាលោកដឹងថាស្រ្តីនេះមានសតិមិនគ្រប់ក៏ដោយលោកព្រមស្មគ្រ័ស្មោះដោយបានរៀបមង្គលការយ៉ាងអធឹកអធម័និងប្រើប្រាស់ជីវិតប្ដីប្រពន្ធដោយពឹងផ្អែកលើការស៊ីឈ្នួលអ្នកភូមិដើម្បីផ្គត់ផ្គង់ជីវៈភាពប្រចាំថ្ងៃ។
បើតាមសម្ដីលោកយាយ ឈឹង ម៉ិ ត្រូវជាម្ដាយជរារស់ក្បែរកូននិងចៅបានអោយដឹងថា រឿងក្រសម្រាប់គ្រួសារគាត់និងកូនគាត់មធ្យមទេ តែសំខាន់កូនពិការភ្នែក រីឯប្រពន្ធត្រូវជាកូនប្រសារស្រីគ្នាមានសតិមិនសូវគ្រប់តាំងពីកំណើត ហើយលោកយាយមិនមានអីចែកឲ្យកូនៗនោះទេ គឺមានតែណែរនាំឲ្យខិតខំតស៊ូក្នុងឆាកជីវិតហើយកើតជាតិណាៗប្រាថ្នាកុំអោយជួបបែបនេះទៀត៕