រដ្ឋាភិបាលយោធាថ្មីរបស់ប្រទេសមីយ៉ាន់ម៉ា បានចាប់ផ្តើមរារាំងពលរដ្ឋរបស់ខ្លួនមិនឲ្យចូលប្រើប្រាស់បណ្តាញសង្គម facebook ក្រោយពីមានពលរដ្ឋមួយចំនួនធំ ក៏ដូចជាអ្នកនយោបាយបានប្រើប្រាស់បណ្តាញសង្គមមួយនេះ ដើម្បីតស៊ូចំពោះការធ្វើរដ្ឋប្រហារដោយក្រុមយោធាកាលពីថ្ងៃច័ន្ទ។
អ្នកប្រើប្រាស់បាននិយាយថា ការរំខានចំពោះបណ្តាញសង្គម facebook បានចាប់ផ្តើមកាលពីយប់ថ្ងៃពុធ ហើយក្រុមហ៊ុនផ្តល់សេវាកម្មទូរស័ព្ទចល័ត Telenor Myanmar បានបញ្ជាក់នៅក្នុងសេចក្តីថ្លែងការណ៍ថា ប្រតិបត្តិករទូរស័ព្ទចល័តនិងអ្នកផ្តល់សេវាអ៊ីនធឺណេតនៅក្នុងប្រទេសមីយ៉ាន់ម៉ាបានទទួលការណែនាំពីក្រសួងទំនាក់ទំនងដើម្បីរារាំងបណ្តាញសង្គម facebook ជាបណ្តោះអាសន្ន។
ក្រុមហ៊ុន Telenor Myanmar ដែលជាផ្នែកមួយនៃក្រុមហ៊ុន Telenor ប្រទេសន័រវេស បាននិយាយថា ខ្លួននឹងអនុវត្តតាមទោះបីជាមានការព្រួយបារម្ភថា បទបញ្ជានេះគឺជាការរំលោភសិទ្ធិមនុស្សក៏ដោយ។
គួរបញ្ជាក់ដែរថា ប្រជាជនមីយ៉ាន់ម៉ាដែលមានជាង ៥០លាននាក់ គឺមានប្រជាជនចំនួន ២៧លាននាក់បានប្រើប្រាស់ facebook ដែលធ្វើឲ្យបណ្តាញសង្គមមួយនេះ ក្លាយជាគេហទំព័រដ៏សំខាន់បំផុតសម្រាប់ប្រជាជនធ្វើការចែករំលែកព័ត៌មាន ក៏ដូចជាការបញ្ចេញមតិរបស់ពួកគេ៕