ក្រោយពីមានការបញ្ជាឲ្យបិទបណ្តាញសង្គម facebook, Telegram និង WhatsApp រួចមក ឥឡូវនេះ រដ្ឋាភិបាលយោធាភូមា បានធ្វើការបន្តបិទ Twitter និង Instagram ជាបន្តទៀត ក្រោយហេតុផលថា ទប់ស្កាត់ការចែកចាយព័ត៌មានមិនពិត។
ក្រុមហ៊ុន Telenor ផ្គត់ផ្គង់សេវាអ៉ិនធើណិតធំបំផុត នៅក្នុងប្រទេសភូមាបានអះអាងថា យោធាបានបង្គាប់ឱ្យក្រុមហ៊ុនខ្លួនបិទបណ្ដាញទំនាក់ទំនង សង្គមទាំងពីរខាងលើ រហូតដល់មានការជូនដំណឹងជាថ្មី។
គួរបញ្ជាក់ថា ការសម្រេចចិត្តបិទបណ្តាញសង្គមរបស់រដ្ឋាភិបាលយោធាភូមានេះ គឺកើតឡើងបន្ទាប់ពីប្រជាជនភូមាមួយចំនួនបានប្រើប្រាស់បណ្ដាញទំនាក់ទំនងសង្គម ដើម្បីរិះគន់យោធា និងអំពាវនាវឱ្យមានបាតុកម្មតវ៉ា ក្រោយពីមានរដ្ឋប្រហារកាលពីថ្ងៃចន្ទដើមសប្ដាហ៍នេះ ដោយយោធាបានចាប់ឃុំខ្លួនលោកស្រី អ៊ុងសាន ស៊ូជី និងមន្ត្រីជាន់ខ្ពស់ជាច្រើនរូបទៀត ព្រមទាំងប្រកាសដាក់ប្រទេសក្នុងគ្រាអាសន្ន រយៈពេលមួយឆ្នាំ៕