នៅក្នុងសន្និសីទកាសែតស្តីពីការចាក់វ៉ាក់សាំងកូវីដ១៩ របស់កងយោធពលខេមរភូមិន្ទ នៅមន្ទីរពេទ្យព្រះកេតុមាលា នារសៀលថ្ងៃទី១០ ខែកុម្ភៈ ឆ្នាំ២០២១នេះ សម្តេចពិជ័យសេនា ទៀ បាញ់ រដ្ឋមន្រ្តីក្រសួងការពារជាតិបានថ្លែងថា នៅសល់តែ១០ទៀត គឺគ្រប់១ខែ ដែលសម្តេចបានចាក់វ៉ាក់សាំងកូវីដ១៩ Sinopharm របស់ប្រទេសចិន។
សម្តេចថា វេជ្ជបណ្ឌិតចិន គឺជាអ្នកចាក់វ៉ាក់សាំងនេះ ឱ្យសម្តេច នៅក្នុងមន្ទីរពេទ្យព្រះកេតុមាលា។
បើតាមការបញ្ជាក់របស់ សម្តេច ទៀ បាញ់ សម្តេចមិនមែនជាអ្នកចាក់វ៉ាក់សាំងមុនគេនោះទេ ពោលគឺមានអ្នកចាក់មុនសម្តេចទៅទៀត ហើយអ្នកជុំវិញខ្លួនសម្តេចក៏សុទ្ធតែបានចាក់រួចហើយដែរ ដោយបង្ហាញថា ក្រោយចាក់រួច វ៉ាក់សាំងនេះ មិនបង្កបញ្ហាដល់សុខភាពនោះទេ។ «ដោយសាររូបខ្ញុំ បានចាក់រួចជាស្រេចហើយ បើដល់ថ្ងៃនេះ សល់តែ១០ថ្ងៃទៀតទេ បានមួយខែ។ មុននឹងខ្ញុំចាក់ ក៏មានអ្នកមួយចំនួនចាក់មុនខ្ញុំទៅទៀត ដើម្បីគេសាកល្បងមើល។ សាកល្បងរួចហើយ ឃើញថា គុណភាពល្អ សុវត្ថិភាព ក៏អត់មានបញ្ហាអីទាំងអស់ គេក៏នាំចាក់ដល់ខ្ញុំ។ មានអ្នកចំនួនដែលនៅជុំវិញខ្លួនខ្ញុំ គឺបានចាក់រួចហើយ»៕
