មិនធម្មតា! យុវជននៅស្រុកបន្ទាយស្រីម្នាក់ អាចរកចំណូលបានជាង​៥ពាន់ដុល្លារក្នុងមួយខែ ពីការ​ចិញ្ចឹមឃ្មុំ

សៀមរាប – យុវជន លី ហួរ ម្ចាស់កសិដ្ឋានចិញ្ចឹមឃ្មុំ ស្ថិត​នៅ​ឃុំ​ខ្នារ​សណ្តាយ ស្រុក​បន្ទាយស្រី បានថ្លែងថា ខ្លួន​អាច​រកចំណូល​បានជាង​៥ពាន់ដុល្លារ​នៅ​ក្នុង​មួយ​ខែពីរបរចិញ្ចឹមឃ្មុំ។

យុវជនរូបនោះថា ខ្លួន​បាន​ប្រើ​រយៈ​ពេល​៤ឆ្នាំ ក្នុង​ការ​សិក្សា​ពី​ការ​ចិញ្ចឹម​ឃ្មុំ​នៅ​ខេត្តរតនគិរី ហើយពេលនេះ លោកបានមកចិញ្ចឹមឃ្មុំ​នៅស្រុកកំណើត​ចំនួន១០០ធុង ដោយអាច​ប្រមូលទឹក​ឃ្មុំ​បាន ៤៥០លីត្រក្នុងមួយ​ខែ និងលក់បាន១លីត្រ ១០ម៉ឺនរៀល។

លោកថា ការចិញ្ចឹមឃ្មុំ មានភាពងាយស្រួលជាងការដាំបន្លែ និងចិញ្ចឹមសត្វផ្សេងៗ ហើយថា នៅស្រុកបន្ទាយស្រីនេះ គឺជាទីតាំងល្អមួយ ក្នុងការចិញ្ចឹមឃ្មុំដោយសារ នៅទីនេះមានផ្កាព្រៃ និងផ្កាដែលគេដាំច្រើន ងាយស្រួលដល់មេឃ្មុំទៅក្រេបយកលម្អង។ ដូច្នេះទឹកឃ្មុំដែលផលិតបាន មានរសជាតិដូចនឹងឃ្មុំព្រៃធម្មជាតិដែរ ដោយពុំមានដាក់លាយសាធាតុផ្សំឡើយ។

_

_

នៅថ្ងៃអនាគត ម្ចាស់កសិដ្ឋានរូបនេះ មានគម្រោងដាក់ធុងចិញ្ចឹមឃ្មុំបន្ថែមទៀត និងរៀបចំកន្លែងចិញ្ចឹមឃ្មុំនេះ សម្រាប់ទាក់ទាញភ្ញៀវទេសចរចូលទស្សនា និងស្នាក់នៅក្នុងខេត្តសៀមរាបឲ្យ​ច្រើន និងទាញយកប្រាក់ចំណូល ដើម្បីលើកកម្ពស់ជីវភាពប្រជាពលរដ្ឋនៅក្នុងមូលដ្ឋាននេះ៕

ប្រភព៖ ក្រសួងព័ត៌មាន