ព្រះសីហនុ – ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ក្នុងឱកាសថ្ងៃបុណ្យចូលឆ្នាំប្រពៃណីចិន-វៀតណាម ដែលមានរយៈពេល៣ថ្ងៃ ដោយគិតចាប់ពីថ្ងៃទី១២ ខែកុម្ភៈ ដល់ថ្ងៃទី១៤ ខែកុម្ភៈ ឆ្នាំ២០២១ ភ្ញៀវទេសចរណ៍ជាតិ និងអន្តរជាតិ បានមកលេងកំសាន្តតាមតំបន់ឆ្នេរសមុទ្រ តាមបណ្ដាកោះ និងរមណីយដ្ឋានជាច្រើនកន្លែងទៀត ក្នុងខេត្តព្រះសីហនុ។
លោក ប្រធានមន្ទីរទេសចរណ៍ខេត្តព្រះសីហនុ បានបន្តថា ភ្ញៀវទេសចរណ៍ជាតិ និងអន្តរជាតិដែលបានមកលេងកំសាន្តនៅខេត្តព្រះសីហនុចំនួន៣ថ្ងៃ សរុបប្រមាណ ៨២,០៦៤នាក់ កើនឡើង២៥,០៣% ធៀបនឹងឆ្នាំ២០២០។ ក្នុងនោះភ្ញៀវជាតិប្រមាណ៧៥,១៨៩នាក់ កើនឡើង ៤៥,១២% ធៀបនឹងឆ្នាំ២០២០ និងភ្ញៀវអន្តរជាតិប្រមាណ៦,៨៧៥នាក់ ថយចុះ៥០,២៦% ធៀបនឹងឆ្នាំ២០២០។
លោកប្រធានមន្ទីរ បានបញ្ជាក់ផងដែរថា ទន្ទឹមនឹងដំណើរកម្សាន្តរបស់ប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិ ក្នុងឱកាស ថ្ងៃឈប់សម្រាកនៃពិធីបុណ្យចូលឆ្នាំប្រពៃណីចិន-វៀតណាមនេះដែរ បើទោះបីមានការប្រព្រឹត្តិទៅបានដោយរលូន និងពោរពេញដោយភាពសប្បាយរីករាយ ក៏ពិតមែន ប៉ុន្តែលោកក៏បានសង្កេតឃើញបញ្ហាប្រឈមមួយចំនួន ដូចជា៖
-ភ្ញៀវទេសចរណ៍ភាគច្រើនមិនសូវប្រើប្រាស់ម៉ាស ហាក់ពុំសូវមានការប្រុងប្រយត្ន័។
– អាជីវកម្មមួយចំនួនមិនបានយកចិត្តទុកដាក់អនុវត្តវិធានសុវត្ថិភាពទេសចរណ៍ដែលក្រសួងទេសចរណ៍បានដាក់ចុះក្នុងការទប់ស្កាត់ការឆ្លងរីករាលដាលជំងឺកូវីដ-១៩
– ការចូលរួមទុកដាក់សម្រាមនិងសំអាតបរិស្ថានអនាម័យនៅពុំទាន់បានល្អប្រសើរ។
ដោយឡែកប្រជាពលរដ្ឋ និងភ្ញៀវទេសចរណ៍មានភាព សប្បាយរីករាយនៅពេលដែលបានមកលេងខេត្តព្រះសីហនុដោយឃើញទិដ្ឋភាពដ៏ស្រស់ស្អាតតាមតំបន់ឆ្នេរសមុទ្រ មានបរិយាកាសថ្មី ល្អស្អាត និងការអភិវឌ្ឍផ្នែកហេដ្ឋារចនាសម្ព័ន្ធ ផ្លូវ ថ្នល់ មានសណ្តាប់ធ្នាប់ មានបន្ទប់ទឹកសាធារណៈនៅតាមឆ្នេរ និងតំបន់កម្សាន្តមួយចំនួន ដោយមិនមានការបង់ថ្លៃសេវា សម្រាប់ផ្ទះសំណាក់ សណ្ឋាគារស្នាក់នៅមានតម្លៃសមរម្យមិនដំឡើងថ្លៃហួសហេតុពេក ប៉ុន្តែសម្រាប់ម្ហូបអាហារ និងកន្លែងជួលអង្គុយលេងនៅតាមឆ្នេរសមុទ្រ មានតម្លៃថ្លៃហួសហេតុពេក ដោយអាជីវករដាក់តុ លក់គ្រឿងសមុទ្រ (លក់ក្រៅតូប) មានតុជ័រតូច១ កៅអីជ័រ៤ តម្លៃ ៣០,០០០រៀល មិនទាន់គិតម្ហូប មឹកអំពង់អាំង ១០ក្បាល់ តម្លៃ ២០,០០០រៀល, មឹកដូង ១០ ក្បាល តម្លៃ ២៥,០០០រៀល និងនៅមានជាច្រើនទៀត៕
ដោយ នាគសមុទ្រ