ភ្នំពេញ – រាជរដ្ឋាភិបាលកម្ពុជានៅព្រឹកថ្ងៃទី១៨ ខែកុម្ភៈ ឆ្នាំ២០២១នេះ បានសម្រេចចេញអនុក្រឹត្យកែសម្រួលមាត្រាមួយចំនួន ដោយធ្វើការផាកពិន័យធ្ងន់ធ្ងរចំពោះអ្នកដែលមិនធ្វើ ឬគេចវេសមិនធ្វើចត្តាឡីស័ក ព្រមទាំងអ្នកដែលញុះញង់ ឬជួយសម្រួលមិនឲ្យធ្វើចត្តាឡីស័ក។
ក្នុងនោះ អ្នកដំណើរ ឬការីនៃយានដឹកជញ្ជូន ដែលគេចមិនឱ្យមន្ត្រីចត្តាឡីស័កធ្វើការត្រួតពិនិត្យ ឬមិនសហការជាមួយនឹងមន្ត្រីចត្តាឡីស័កក្នុងការអនុវត្តវិធានការសុខាភិបាល ឬមិនបំពេញតាមបែបបទ ដែលមានកំណត់ស្ដីពីវិធានការ សុខាភិបាលដើម្បីទប់ស្កាត់ និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល ត្រូវទទួលពិន័យអន្តរការណ៍ជាប្រាក់ពី ១.០០០.០០០ (មួយលាន) រៀល ទៅ ៥.០០០.០០០ (ប្រាំលាន) រៀល និងតម្រូវឱ្យអនុវត្តវិធានការសុខាភិបាល។
ហើយជនណាដែលផ្តើមគំនិត ដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយ ចេតនាដល់អ្នកដំណើរឬការីនៃយានដឹកជញ្ជូន ឱ្យគេចចេញពីការត្រួតពិនិត្យ ឬគេចវេះពីការអនុវត្ត វិធានការចត្តាឡីស័ក ត្រូវទទួលពិន័យអន្តរការណ៍ជាប្រាក់ពី ១០.០០០.០០០ (ដប់លាន) រៀល ទៅ ៥០.០០០.០០០ (ហាសិបលាន) រៀល។
ក្នុងករណីជនល្មើសមិនព្រមបង់ប្រាក់ពិន័យអន្តរការណ៍ ក្នុងរយៈពេល ៣០ (សាមសិប) ថ្ងៃ គិតចាប់ពីថ្ងៃទទួលបាន សេចក្ដីសម្រេចស្ដីពីការពិន័យអន្តរការណ៍ មន្ត្រីក្រសួងសុខាភិបាលដែលមាននីតិសម្បទាជានគរបាល យុត្តិធម៌ ត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីជាធរមាន។
គួរបញ្ជាក់ដែរថា ការសម្រេចកែសម្រួលមាត្រាខ្លះក្នុងការដាក់ពិន័យធ្ងន់ធ្ងរចំពោះអ្នកមិនធ្វើចត្តាឡីស័កនេះ គឺធ្វើឡើងក្រោយពីមានពលករមួយចំនួនបានគេចវេសមិនព្រមធ្វើចត្តាឡីស័ក ដែលនាំឲ្យមានហានិភ័យធ្ងន់ធ្ងរចំពោះការចម្លងវីរុសផ្លូវដង្ហើមកូវីដ១៩ មកក្នុងប្រទេសកម្ពុជា ខណៈដែលប្រទេសជិតខាងកំពុងតែមានការរីករាលដាលក្នុងសហគមន៍ធ្ងន់ធ្ងរ៕
