សម្តេចនាយករដ្ឋមន្រ្តី ហ៊ុន សែន បានប្រកាសនៅព្រឹកថ្ងៃនេះថា កម្ពុជាបានផ្ទុះការឆ្លងកូវីដ១៩ក្នុងសហគមន៍ជាថ្មីទ្រង់ទ្រាយធំ ដោយហៅថា «សហគមន៍២០កុម្ភៈ» បន្ទាប់ពីមានករណីឆ្លងចំនួន ៣២នាក់ ក្នុងរយៈពេលត្រឹម ១០ម៉ោង។
ការផ្ទុះជំងឺនេះ គឺចេញពីក្លឹប N8 (ដោយជនជាតិចិន) ដោយសម្តេចបញ្ជាឱ្យស្រាវជ្រាវរកឱ្យឃើញនូវអ្នកពាក់ព័ន្ធទាំងអស់នឹងក្លឹបនេះ។ ការរកឃើញអ្នកឆ្លងជំងឺនេះ ដោយសារតែមានអ្នកដែលចង់ចេញទៅក្រៅប្រទេស ហើយបានស្នើសុំវិញ្ញាបនបត្រពិនិត្ររកកូវីដ១៩។
សម្តេចតេជោ បានឱ្យដឹងថា អាជ្ញាធររាជធានីភ្នំពេញ បានបិទតំបន់មួយចំនួនរួចមកហើយ តាំងពីយប់មិញ។ សម្តេចបានអំពាវនាវឱ្យអ្នករស់ក្នុងតំបន់ដែលត្រូវបានបិទ សហការឱ្យគ្រូពេទ្យយកសំណាក និងធ្វើចត្តាឡីស័ក។
គួរបញ្ជាក់ថា នេះជាការផ្ទុះសហគមន៍លើកទី៣ នៅកម្ពុជា បន្ទាប់ពី ព្រឹត្តិការណ៍៣វិច្ឆិកា និងព្រឹត្តិការណ៍សហគមន៍២៨វិច្ឆិកា។
