ក្រសួងអប់រំ យុវជន និងកីឡា នៅយប់ថ្ងៃទី២១ ខែកុម្ភៈ ឆ្នាំ២០២១នេះ បានសម្រេចផ្អាកជាបណ្តោះអាសន្នចំពោះសាលារៀនចំនួន២ស្ថិតក្នុងរាជធានីភ្នំពេញ គឺវិទ្យាល័យសម្តេច ហ៊ុន សែន ភ្នំពេញថ្មី និងសាលាអន្តរជាតិ អេស អាយ អេស សាខាឡាក់គីស្តារ។
បើតាមសេចក្តីជូនដំណឹងរបស់សាលាអន្តរជាតិអេស អាយ អេស បានឲ្យដឹងថា មានអាណាព្យាបាលសិស្សម្នាក់រៀនថ្នាក់ទី៦ បានពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ហើយបានធ្វើតេស្តរកកូវីដ១៩ ឃើញថា វិជ្ជមាន។
ជាមួយគ្នានេះដែរ ក្រសួងអប់រំ យុវជន និងកីឡា ក៏បានស្នើទៅដល់លោកគ្រូ អ្នកគ្រូ សិស្សានុសិស្ស រួមទាំងកម្មករ និងអ្នកលក់ដូរ នៃសាលារៀនទាំង២ សូមអញ្ជើញមកសាលានាថ្ងៃទី២២ ខែកុម្ភៈ ឆ្នាំ២០២១ វេលាម៉ោង ៩ព្រឹក ដើម្បីឲ្យមន្រ្តីសុខាភិបាលធ្វើការយកសំណាក៕
