ភ្នំពេញ – ក្នុងសេចក្តីប្រកាសព័ត៌មាននៅព្រឹកមិញនេះ ក្រសួងសុខាភិបាលបានបញ្ជាក់ថា គេបានរកឃើញវីរុសកូវីដ១៩បម្លែងថ្មី នៅលើអ្នកជំងឺ៣នាក់ ក្នុងនោះម្នាក់មានអាសយដ្ឋាននៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ និងពីរនាក់ទៀតជាអ្នកនៅក្លឹបកំសាន្ត N8។
ក្រសួងបានបញ្ជាក់ថា វីរុសកូវីដ១៩បម្លែងថ្មីនេះ ការចម្លងរបស់វាមានសភាពកាចសាហាវ និងលឿនជាងធម្មតា ហើយករណីឆ្លងលឿនបែបនេះ នឹងមានលទ្ធភាពអាចបន្តឆ្លងនៅក្នុងសហគមន៍ ប្រសិនបើប្រជាពលរដ្ឋយើង មិនបានយកចិត្តទុកដាក់បន្តអនុវត្តន៍វិធានការណ៍សុខាភិបាល ដែលក្រសួងក៏ធ្លាប់បានចេញសេចក្តីណែនាំក្រើនរំលឹក អំពាវនាវជារឿយៗដែរ។
ជាមួយគ្នានេះ ក្រសួងសុខាភិបាលក៏សូមធ្វើការក្រើនរំលឹក និងអំពាវសារជាថ្មី ជូនដល់បងប្អូនប្រជាពលរដ្ឋទាំងអស់ បន្តចូលរួមទប់ស្កាត់ការចម្លងវីរុសកូវីដ១៩នៅក្នុងសហគមន៍យើង ដោយក្នុងនោះបងប្អូនប្រជាពលរដ្ឋទាំងអស់នៅទូទាំងប្រទេស និងជាពិសេសអ្នករស់នៅក្នុងរាជធានីភ្នំពេញ និងខេត្តកណ្តាល ត្រូវប្រកាន់យកនូវការប្រុងប្រយ័ត្នខ្លួនជាប់ជានិច្ច គ្រប់គ្រងក្រុមគ្រួសារឲ្យបានល្អ សហការសាមគ្គីភាពគ្នា ជួយគ្នាទៅវិញទៅមក ព្រមទាំងចូលរួមអនុវត្តន៍ដោយម៉ឺងម៉ាត់នូវវិធានការសុខាភិបាល៕