តាកែវ – ជនសង្ស័យពាក់ព័ន្ធនឹងករណីជួញដូរ និងប្រើប្រាស់គ្រឿងញៀនចំនួន២នាក់ ត្រូវបានសមត្ថកិច្ចស្រុកព្រៃកប្បាសធ្វើការចាប់ខ្លួនកាលពីវេលាម៉ោងប្រមាណជាង១១យប់ ថ្ងៃទី២២ ខែកុម្ភៈ ឆ្នាំ២០២១ នៅចំណុចមាត់ស្ទឹងត្រើយខាងកើត ក្នុងភូមិកំពង់សាម៉ ឃុំកំពង់រាប ស្រុកព្រៃកប្បាស ខេត្តតាកែវ។
ជនសង្ស័យទាំង២នាក់នេះ ត្រូវបានបញ្ជាក់ថា មានឈ្មោះ ឈីវ ឌី ភេទប្រុស អាយុ៤១ឆ្នាំ រស់នៅភូមិកំពង់សាម៉ ឃុំកំពង់រាប ស្រុកព្រៃកប្បាស ខេត្តតាកែវ ជាមុខសញ្ញាជួញដូរ និងម្នាក់ទៀតមានឈ្មោះ ធី បញ្ញា ភេទប្រុស អាយុ៣០ឆ្នាំ រស់នៅភូមិព្រែកថ្មី ឃុំព្រែកថ្មី ស្រុកកោះធំ ខេត្តកណ្តាល ជាមុខសញ្ញាប្រើប្រាស់។
ក្នុងការឃាត់ខ្លួននោះ សមត្ថកិច្ចក៏បានដកហូតវត្ថុតាងមួយចំនួនរួមមាន៖ ម្សៅក្រាមសង្ស័យជាសារធាតុញៀនចំនួន៣កញ្ចប់, ម៉ូតូ២គ្រឿង, ទូរស័ព្ទ២គ្រឿង និងវត្ថុប្រើប្រាស់គ្រឿងញៀនមួយចំនួនទៀត។
បច្ចុប្បន្នជនសង្ស័យ រួមទាំងវត្ថុតាង ត្រូវកម្លាំងអធិការដ្ឋាននគរបាលស្រុកព្រែកប្បាសធ្វើការសាកសួរ និងកសាងសំណើងរឿងតាមនីតិវិធី៕