ភ្នំពេញ – ក្រសួងសុខាភិបាលកម្ពុជា នៅថ្ងៃនេះ (២៤ ខែកុម្ភៈ) បានប្រកាសច្រានចោលទាំងស្រុង ចំពោះការចុះផ្សាយរបស់សារព័ត៌មានដែលថា កម្ពុជាលក់វ៉ាក់សាំងកូវីដ១៩ ដែលជាជំនួយរបស់ចិន។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំក្រសួងសុខាភិបាល បានថ្លែងថា «យើងមិនមានឱ្យអ្នកដែលទៅចាក់បង់ប្រាក់នោះទេ ហើយបច្ចុប្បន្ននេះយើងអត់មានវ៉ាក់សាំងណាដែលចាក់ឱ្យក្នុងតម្លៃហ្នឹង (១២០ដុល្លារ)ដែរ ពីព្រោះវ៉ាក់សាំងយើងមានកម្រិត ហើយយើងសុទ្ធតែកំណត់មុខសញ្ញាសម្រាប់ក្រុមមនុស្សដែលត្រូវមកចាក់ ហើយយើងមានបញ្ជីឈ្មោះអ្នកចាក់ត្រឹមត្រូវ»។
សូមបញ្ជាក់ថា ប្រទេសចិនបានជំនួយវ៉ាក់សាំងកូវីដ១៩ មកដល់ប្រទេសកម្ពុជាចំនួន១លានដូស ហើយកាលពីថ្ងៃទី៧ ខែកុម្ភៈ កន្លងទៅ វ៉ាក់សាំងចំនួន៦០ម៉ឺនដូសត្រូវបានដឹកមកដល់ប្រទេសកម្ពុជា ហើយក៏បានធ្វើការបែងចែកចាក់ទៅដល់អ្នកដែលមានអាទិភាព ពោលគឺអ្នកដែលនៅជួរមុខប្រឈមនឹងការឆ្លងមុនគេ៕