សៀមរាប – នៅល្ងាចថ្ងៃនេះ (២៤ កុម្ភៈ) សមត្ថកិច្ចខេត្តសៀមរាប ដឹកនាំសម្របសម្រួលនីតិវិធីដោយលោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប បានចុះទៅចំនុចផ្ទះវីឡាជួលមួយកន្លែងស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប ដើម្បីនាំខ្លួនជនជាតិចិន ម្នាក់ឈ្មោះ SHEN KAIDONG ភេទប្រុសអាយុ៥២ឆ្នាំ មុខរបរជានិពន្ធនាយក កាសែតអង្គរធូដេ មកសាកសួរពាក់ព័ន្ធនឹងករណីផ្សព្វផ្សាយពត៌មាននៅលើគណនី វីឆាត ឈ្មោះអង្គរធូដេ ដែលមានខ្លឹមសារថា ការចាក់វ៉ាក់សាំងការពារជំងឺកូវីដ១៩ ត្រូវចំណាយថវិការចំនួន១២០ដុល្លារ។
និពន្ធនាយកកាសែតអង្គរធូដេ
គួរបញ្ជាក់ដែរថា ពាក់ព័ន្ធនឹងព័ត៌មានពីការលក់វ៉ាក់សាំងនេះ នៅថ្ងៃនេះដែរក្រសួងសុខាភិបាលកម្ពុជា បានប្រកាសច្រានចោលទាំងស្រុង ដោយថា ការចាក់វ៉ាក់សាំងកូវីដ១៩ ដែលជាជំនួយរបស់ចិននៅកម្ពុជា គឺបាននិងកំពុងចាក់ទៅលើក្រុមមនុស្សអាទិភាព ដែលក្រសួងសុខាភិបាលប្រកាសប៉ុណ្ណោះ ។
«យើងមិនមានឱ្យអ្នកដែលទៅចាក់បង់ប្រាក់នោះទេ ហើយបច្ចុប្បន្ននេះយើងអត់មានវ៉ាក់សាំងណាដែលចាក់ឱ្យក្នុងតម្លៃហ្នឹង (១២០ដុល្លារ)ដែរ ពីព្រោះវ៉ាក់សាំងយើងមានកម្រិត ហើយយើងសុទ្ធតែកំណត់មុខសញ្ញាសម្រាប់ក្រុមមនុស្សដែលត្រូវមកចាក់ ហើយយើងមានបញ្ជីឈ្មោះអ្នកចាក់ត្រឹមត្រូវ»។
សូមបញ្ជាក់ថា ប្រទេសចិនបានជំនួយវ៉ាក់សាំងកូវីដ១៩ មកដល់ប្រទេសកម្ពុជាចំនួន១លានដូស ហើយកាលពីថ្ងៃទី៧ ខែកុម្ភៈ កន្លងទៅ វ៉ាក់សាំងចំនួន៦០ម៉ឺនដូសត្រូវបានដឹកមកដល់ប្រទេសកម្ពុជា ហើយក៏បានធ្វើការបែងចែកចាក់ទៅដល់អ្នកដែលមានអាទិភាព ពោលគឺអ្នកដែលនៅជួរមុខប្រឈមនឹងការឆ្លងមុនគេ៕
