តាកែវ – ក្រោយពីល្បីល្បាញរឿងប្រើហិង្សាលើប្រជាពលរដ្ឋម្នាក់បណ្តាលឲ្យស្លាប់ ដោយសំណុំរឿងនេះមិនទាន់ផុតពីដៃតុលាការផងនោះ ពេលនេះ លោក គឹម សារិទ្ធ ហៅមាន ដែលមានតួនាទីជា នាយរងអធិការកិច្ចចតុមុខ បានល្បីល្បាញរឿងមួយទៀតហើយ ក្រោយពីរូបលោកដែលជាមន្រ្តីជលផល បែរជាទៅចាប់រ៉ឺម៉កដឹកពងទារបស់ប្រជាពលរដ្ឋ ដែលទំនងជាចង់ជំរិតទារលុយ ហើយថា ជាបញ្ជារបស់ថ្នាក់លើ។
តាមមន្រ្តីសមត្ថកិច្ចនិយាយថា ហេតុការណ៍នេះ បានកើតឡើងនៅស្រុកគិរីវង់ ដោយលោក គឹម សារិទ្ធ ដែលជាមន្រ្តីជលផល និងបក្ខពួកម្នាក់ទៀតដែលទំនងជាស្រវឹង បានចុះទៅឃាត់រ៉ឺម៉កដឹកពងទារបស់ប្រជាពលរដ្ឋ ហើយទំនងជាទារលុយមិនបាន ក៏បាននាំរ៉ឺម៉កនោះទៅកាន់អធិការដ្ឋាននគរបាលស្រុកគិរីវង់ដើម្បីឲ្យសមត្ថកិច្ចធ្វើកំណត់, តែដោយសមត្ថកិច្ចមិនដឹងធ្វើកំណត់ហេតុយ៉ាងម៉េច ព្រោះគ្មានកំហុសអ្វីផងនោះ ធ្វើឲ្យលោក គឹម សារិទ្ធ ខឹង ក៏បានទូរស័ព្ទហៅបក្ខពួកជាមន្រ្តីជលផល១ឡានពីខេត្តតាកែវមកទាំងយប់។
ករណីនេះ គេមានការងឿងឆ្ងល់ថា ហេតុអ្វីលោក គឹម សារិទ្ធ ដែលជាមន្រ្តីជលផល បែរជាមកចាប់ពងទា ដែលជាសមត្ថកិច្ចរបស់បសុពេទ្យទៅវិញ? ហើយបានប្រើពាក្យថា នេះគឺជាបញ្ជារបស់ថ្នាក់លើ។
ចំពោះករណីនេះ លោក សៅ កុសល នាយខណ្ឌរដ្ឋបាលជលផលខេត្តតាកែវ បានថ្លែងនៅព្រឹកមិញនេះថា លោកកំពុងតែប្រជុំជាមួយលោកអភិបាលខេត្តតាកែវដើម្បីពិភាក្សាពីសំណុំរឿងនេះហើយ ថាតើហេតុអ្វីបានជាមន្រ្តីជលផល ទៅឃាត់រ៉ឺម៉កដឹកបងទារបស់ប្រជាពលរដ្ឋ?
យ៉ាងណាក៏ដោយ បើយោងតាមសារជាសំឡេងរបស់សម្តេចតេជោនាយករដ្ឋមន្រ្តី ទៅកាន់អភិបាលខេត្តជាប់ព្រំដែនប្រទេសជិតខាងកាលពីថ្ងៃទី២៤ ខែកុម្ភៈ សម្តេចតេជោនាយករដ្ឋមន្រ្តី ក៏បានស្នើរដល់អាជ្ញាធរឲ្យជួយសម្រួលដល់ការរកទទួលទានរបស់បងប្អូនប្រជាពលរដ្ឋនៅតាមព្រំដែន ក្នុងនោះជាការកត់សម្គាល់ សម្តេចក៏បានធ្វើការស្តីបន្ទោសចំពោះស្ថាប័នមួយចំនួនផងដែរ ចំពោះការចេញវិធានការហាមឃាត់មិនឲ្យមានការនាំចូលផលិតផលមួយចំនួនពីប្រទេសជិតខាងដូចជាត្រីជាដើម ដែលវាបានខុសទៅនឹងកិច្ចព្រមព្រៀងពាណិជ្ជកម្ម៕