ព្រៃវែង – យោងតាមសេចក្តីរាយការណ៍បានឲ្យដឹងថា នៅរសៀលថ្ងៃទី២៥ ខែកុម្ភៈ ឆ្នាំ២០២១នេះ មានករណីរថយន្តចំនួន៣គ្រឿងបានបុកគ្នានៅក្បែរក្រុងព្រៃវែង ដោយបណ្តាលឲ្យរថយន្តចំនួន២គ្រឿងផ្ទុះឆេះ ព្រមទាំងមានមនុស្សចំនួន៣នាក់បានរងរបួសធ្ងន់ និងស្រាល។
សមត្ថកិច្ចថា មុនពេលកើតហេតុ មានរថយន្ត៣គ្រឿង បើកបរបញ្ច្រាសទិសគ្នាពីជើងទៅត្បូង ក្នុងល្បឿនលឿនដូចគ្នា លុះមកដល់ចំណុចកើតហេតុ មានរថយន្តមួយគ្រឿងបានបើករំលោភចូលផ្លូវអាទិភាពរបស់រថយន្ត២គ្រឿងទៀត ទើបបណ្ដាលឲ្យបុកគ្នាពេញទំហឹង និងផ្ទុះឆេះរថយន្ត២គ្រឿងខូចខាតស្ទើរទាំងស្រុង ចំណែកមនុស្ស ២នាក់ រងរបួសបាក់ជើង និងម្នាក់ទៀតរបួសស្រាល។
ក្រោយពេលកើតហេតុ សមត្ថកិច្ចជំនាញបានបញ្ជូនរថយន្តពន្លត់អក្គិភ័យចុះអន្តរាគមន៍បាញ់ទឹកពន្លត់ភ្លើងដែលឆេះរថយន្តទាំង២គ្រឿងយ៉ាងសន្ធោសន្ធៅនោះ និងបញ្ជូនជនរងគ្រោះទៅកាន់មន្ទីរពេទ្យ ដើម្បីសង្គ្រោះបន្ទាន់៕