តាកែវ – យុវជនម្នាក់ដែលធ្លាប់ជាប់ពន្ធនាគាររយៈពេល១ឆ្នាំពីបទអំពើលួច នឹងទើបចេញមកវិញកាលពីដើមខែធ្នូ ឆ្នាំ២០២០កន្លងទៅ ឥឡូវនេះ ត្រូវសមត្ថកិច្ចស្រុកព្រៃកប្បាសចាប់ខ្លួនម្តងទៀត ក្រោយពីធ្វើសកម្មភាពលួចទ្រព្យសម្បត្តិប្រជាពលរដ្ឋ។
ការចាប់ខ្លួននោះ បានធ្វើឡើងកាលពីវេលាម៉ោងប្រមាណ ៩ព្រឹក ថ្ងៃទី២៦ ខែកុម្ភៈ ឆ្នាំ២០២១នេះ ក្រោយពីមានពាក្យបណ្តឹងរបស់គ្រូបង្រៀនម្នាក់ថា មានគេចូលមកគាស់ទូយកលុយរបស់គាត់អស់ប្រមាណ ៣០ម៉ឺនរៀល នៅចំណុចសាលាឯកជន ស្ថិតក្នុងភូមិល្វាត្នោត ឃុំព្រៃល្វា ស្រុកព្រៃកប្បាស ខេត្តតាកែវ។
ជនសង្ស័យត្រូវបានបញ្ជាក់ថា មានឈ្មោះ លី សេងហុង ភេទប្រុស អាយុ២៣ឆ្នាំ មានមុខរបរមិនពិតប្រាកដ និងរស់នៅភូមិព្រៃល្វាកើត ឃុំព្រៃល្វា ស្រុកព្រៃកប្បាស។
តាមជនរងគ្រោះថា ខ្លួនបានទុកលុយនៅក្នុងហិបដែក ហើយដាក់ក្នុងទូលក់ភេសជ្ជៈ នៅខាងមុខអគារសិក្សា ហើយក៏ត្រូវជនសង្ស័យផ្លោះរបងចូលទៅយកកូនកាំបិតចុងស្រួចប្រវែង ៣០សង់ទីម៉ែត្រចាក់វះហិបដែកលូកយកលុយ ហើយគេចខ្លួនបាត់។
យ៉ាងណាក៏ដោយ បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនយកទៅកាន់អធិការដ្ឋាននគរបាលស្រុកព្រៃកប្បាស ដើម្បីសាកសួរ និងកសាងសំណុំរឿងតាមនីតិវិធី៕