ទង់ជាតិរបស់ព្រះរាជាណាចក្រកម្ពុជា ត្រូវគេរំលេចជាច្រើនកន្លែងនៅលើកំពូលអគារខ្ពស់ៗក្នុងទីក្រុងសៀងហៃ ប្រទេសចិន កាលពីយប់ថ្ងៃទី១៥ ខែមីនា ដើម្បីជាការស្វាគមន៍ចំពោះព្រះវត្តមានរបស់ព្រះមហាក្សត្រខ្មែរ ព្រះករុណា ព្រះបាទសម្តេច នរោត្តម សីហមុនី ដែលព្រះអង្គបានយាងបំពេញទស្សនកិច្ចនៅទីនោះ។
ក្នុងព្រះរាជដំណើរទៅកាន់ក្រុងសៀងហៃ កាលពីថ្ងៃទី១៥ ខែមីនា ព្រះអង្គបានសព្វព្រះរាជហឫទ័យទទួលជួបសវនការជាមួយលោក Li Qiang លេខាធិការនៃគណៈកម្មាធិការគណបក្សក្រុងសៀងហៃ និងលោក Gao Zheng អភិបាលក្រុងសៀងហៃផងដែរ។
លោក Li Qiang ក្នុងនាមគណៈកម្មាធិការគណបក្សក្រុង រដ្ឋបាលក្រុង និងប្រជាជនទូទាំងក្រុងសៀងហៃ បានថ្វាយនូវការស្វាគមន៍យ៉ាងកក់ក្តៅជាទីបំផុត ចំពោះព្រះរាជដំណើរទស្សនកិច្ចរបស់ ព្រះអង្គ និងបានទូលថ្វាយអំពីភាពរីកចម្រើននានាទាំងឡាយដែលទីក្រុងសៀងហៃសម្រេចបាន។
លោក Li Qiang សង្ឃឹមថា តាមរយៈព្រះរាជដំណើរទស្សនកិច្ចដ៏ឧត្តុង្គឧត្តមនេះ នឹងធ្វើឱ្យមានការយល់ដឹងកាន់តែស៊ីជម្រៅអំពីទីក្រុងសៀងហៃ ព្រមទាំងជំរុញការផ្លាស់ប្តូរមិត្តភាពរវាងភាគីទាំងពីរឱ្យឈានដល់កម្រិតថ្មីមួយទៀត៕
