(តាកែវ) – អាជ្ញាធរស្រុកអង្គរបូរីបានបញ្ជាក់នៅថ្ងៃនេះ ករណីសំណង់របស់លោក នាង សុខុម មេគយច្រកទ្វេភាគីបាក់ដៃ ដែលបានសង់នៅជើងភ្នំ រហូតដល់កំពូលភ្នំបូរីនោះ ឥឡូវនេះអាជ្ញាធរបានចុះទៅហាមឃាត់មិនឲ្យមានការសាងសង់ទៀតទេ។
លោក ឌឹម គឹមសាន្ត អភិបាលស្រុកអង្គរបូរី បានបញ្ជាក់ថា ករណីសំណង់របស់លោក នាង សុខុម នៅលើភ្នំបូរីនេះ អាជ្ញាធរនឹងអនុញ្ញាតឲ្យសង់ឡើងវិញ ប្រសិនបើលោក នាង សុខុម រត់ការផ្លូវច្បាប់ពាក់ព័ន្ធនឹងសំណង់នោះឲ្យបានគ្រប់គ្រាន់។
គួរបញ្ជាក់ថា រយៈពេលថ្មីៗនេះ ប្រជាពលរដ្ឋរស់នៅក្នុងស្រុកអង្គរបូរីបានរាយការណ៍ថា ដីភ្នំមួយផ្នែក នៃភ្នំបូរី ទីតាំងប្រវត្តិសាស្រ្តរបស់ប្រទេសកម្ពុជា ត្រូវបានអ្នកមានលុយ និងមានអំណាចមួយចំនួន បានធ្វើរបងព័ទ្ធយក ហើយជាការកត់សម្គាល់ គេឃើញលោក នាង សុខុម ដែលជាមន្រ្តីគយនៅច្រកបាក់ដៃ បានប្រើប្រាស់កម្មករ ឲ្យធ្វើរបង និងសំណង់រឹងផ្សេងៗពីជើងភ្នំ រហូតជិតដល់កំពូលភ្នំ ដោយគេមិនឃើញមានការហាមឃាត់ ខណៈដីភ្នំ គឺជាសម្បត្តិរបស់រដ្ឋនោះ។
យ៉ាងណាក៏ដោយ ពាក់ព័ន្ធនឹងការទន្រ្ទានយកដីភ្នំ និងសង់សំណង់នៅភ្នំបូរីនេះ យើងមិនអាចទាក់ទងសុំការបំភ្លឺពីលោក នាង សុខុម ដែលរងការចោទប្រកាន់បានទេនៅថ្ងៃនេះ៕