បន្ទាប់ពីធ្វើការឃាត់ខ្លួនជនសង្ស័យករណីគ្រឿងញៀនម្នាក់កាលពីពេលថ្មីៗនេះ កម្លាំងកងរាជអាវុធហត្ថខេត្តតាកែវ បានធ្វើការពន្លាតដែនសមត្ថកិច្ចទៅកាន់រាជធានីភ្នំពេញ ដោយសហការជាមួយកម្លាំងកងរាជអាវុធហត្ថរាជធានីភ្នំពេញ ក្រោមការសម្របសម្រួលពី លោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ និង លោក ប្លង់ សុផល ព្រះរាជអាជ្ញារងអម សាលាដំដូងរាជធានីភ្នំពេញ ឈានទៅដល់ការឃាត់ខ្លួនជនសង្ស័យចំនួន២នាក់ កាលពីរសៀលថ្ងៃទី២៦ ខែមីនា ឆ្នាំ២០២១។
ជនសង្ស័យទាំង២នាក់នោះ ត្រូវបានបញ្ជាក់ថា ១-ឈ្មោះ ឡុង សាវុធ ភេទប្រុស អាយុ៣៤ឆ្នាំ (ឃាត់នៅចំនុចលើផ្លូវលេខ១៨២ សង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ និង ២-ឈ្មោះ ឡុង សុខណា ភេទស្រី អាយុ៣១ឆ្នាំ (ឃាត់នៅចំនុចផ្លូវ១៦៦ ក្បែរផ្សារអូឬស្សី សង្កាត់អូរឬស្សីទី១ ខណ្ឌ៧មករា រាជធានីភ្នំពេញ។
បន្ទាប់មកកម្លាំងជំនាញចម្រុះបាននាំជនសង្ស័យទាំងពីរនាក់ទៅឆែកឆេរផ្ទះលេខ១៤៨ ផ្លូវ១២២ ភូមិ១១ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ដោយបានដកហូតវត្ថុតាងដកហូតរួមមាន៖ ថ្នាំគ្រាប់ពណ៍បៃតងខ្ចី(សង្ស័យជាសារធាតុញៀនចំនួន១៥គ្រាប់), ក្រាមពណ៌សថ្លាចំនួន០៥កញ្ចប់ សង្ស័យជាគ្រឿងញៀន), ម៉ូតូ0២គ្រឿង, រថយន្ត ០១គ្រឿង(ម៉ាកBMW ពណ៌ស ស្លាកលេខ ខ.ភ.ម ០២:៤៧៥០) ព្រមទាំងឧបករណ៍ប្រើប្រាស់ និងថង់សម្រាប់វេចខ្ចប់ គ្រឿងញៀន មួយចំនួន។
បច្ចុប្បន្នជនសង្ស័យកម្លាំងជំនាញកសាងសំណុំរឿងបញ្ជូនទៅអមសាលាដំបូងខេត្តតាកែវចាត់ការតាមនិយាយនីតិវិធី៕
