ក្រុមហ៊ុនវិនិយោគ GFX ដែលគេដឹងថា ជាក្រុមហ៊ុនវិនិយោគទៅលើការទិញភាគហ៊ុន ឬមាសនៅក្រៅប្រទេសនោះ បានប្រកាសផ្អាកប្រតិបត្តិការរបស់ខ្លួនជាបណ្តោះអាសន្នកាលពីថ្ងៃទី២៩ ខែមីនា ឆ្នាំ២០២១ ក្រោមហេតុផលថា មានបញ្ហាបច្ចេកទេស ខណៈដែលអតិថិជននិយាយថា ក្រុមហ៊ុនយកលេសព្យាយាមបិទក្រុមហ៊ុន និងបោកយកលុយរបស់ពួកគេសរុបប្រមាណជា ២០លានដុល្លារ។
ក្រុមអតិថិជនដែលបានដាក់ទុនជាមួយក្រុមហ៊ុន ដោយអ្នកខ្លះមានរហូតដល់ម៉ឺនដុល្លារនោះ បាននិយាយថា ការសម្រេចចិត្តធ្វើការវិនិយោគជាមួយក្រុមហ៊ុននេះ មកពីពួកគាត់មើលឃើញថា ក្រុមហ៊ុនមានច្បាប់ត្រឹមត្រូវ ហើយគ្រប់គ្រងដោយកូនអ្នកធំមួយចំនួនថែមទៀត ទើបធ្វើឲ្យពួកគាត់ហ៊ានដាក់លុយមកបណ្តាក់ទុន តែចុងក្រោយបានប្រកាសផ្អាកដំណើរការ ដោយមិនសងលុយមកអតិថិជនវិញ។
ចំពោះករណីនេះ យើងមិនអាចទាក់ទងសុំការបំភ្លឺពីខាងក្រុមហ៊ុន GFX បានទេនៅថ្ងៃនេះ, តែបើយោងតាមសេចក្តីជូនដំណឹងមួយរបស់ក្រុមហ៊ុន GFX ដែលបានផ្ញើទៅកាន់អគ្គនាយកនិយ័តករមូលបត្រកម្ពុជាបានបញ្ជាក់ថា កាលពីពេលថ្មីៗនេះ ដោយមានការសង្ស័យទៅលើប្រតិបត្តិការ និងប្រព័ន្ធហិរញ្ញវត្ថុនៅក្នុងក្រុមហ៊ុន ខ្លួនបានផ្តើមធ្វើការត្រួតពិនិត្យឯកសារឡើងវិញ និងបានធ្វើសវនកម្មក្នុងក្រុមហ៊ុន ហើយបានរកឃើញថា គណៈគ្រប់គ្រងមួយចំនួននៅក្នុងក្រុមហ៊ុនបានកិបកេងប្រាក់ក្រុមហ៊ុន និងប្រាក់របស់អតិថិជនយ៉ាងច្រើន ដែលក្រុមហ៊ុនកំពុងចាត់ការដោះស្រាយតាមយុត្តាធិការ៕