ករណីចាក់ដីរំលោភយកដីបឹងជាសម្បត្តិរបស់រដ្ឋស្ថិតនៅក្នុងភូមិសាស្រ្តឃុំសំរោង ស្រុកសំរោង ខេត្តតាកែវ ឥឡូវនេះ លោកអភិបាលស្រុកបានទុកពេល១សប្តាហ៍ដល់អ្នកដែលរំលោភបំពាននោះ ឲ្យកាយដីចេញវិញឲ្យអស់។
លោក កេត ម៉ៅ អភិបាលស្រុកសំរោង តាមរយៈលិខិតមួយច្បាប់ ផ្ញើទៅកាន់លោក ឃុន គា មានទីលំនៅភូមិព្រៃទទឹង ឃុំសំរោង ស្រុកសំរោង បានលើកឡើងថា ក្នុងរយៈពេលប៉ុន្មានថ្ងៃកន្លងមកនេះ រដ្ឋបាលស្រុកសំរោង បានសង្កេតឃើញថា លោក ឃុន គា បានចាក់ដីរំលោភចូលដីសាធារណៈរបស់រដ្ឋ ដូច្នេះរដ្ឋបាលស្រុកស្នើឲ្យលោក ឃុន គា កាយដីនេះចេញវិញឲ្យអស់ ដោយទុករយៈពេល១សប្តាហ៍ ចាប់ពីថ្ងៃជូនដំណឹងនេះតទៅ។
ករណីមិនព្រមអនុវត្តតាមការកំណត់នេះទេ រដ្ឋបាលស្រុកសំរោង បានព្រមាននឹងចាត់វិធានការតាមផ្លូវច្បាប់។
ចំណាត់ការភ្លាមៗរបស់អភិបាលស្រុកសំរោងនៅពេលនេះ បានទទួលការគាំទ្រយ៉ាងខ្លាំងពីប្រជាពលរដ្ឋ ដែលលោកអភិបាលស្រុកបានចាត់វិធានការទាន់ពេលវេលា ខណៈដែលដីបឹងត្រង់ចំណុចនោះ តែងតែមានការរំលោភបំពានយកតាមរបៀបកណ្តៀរ ដោយមានការចាក់ដីរំលោភយកម្តងបន្តិចៗ រួចដាំដំណាំអស់រយៈពេលជាច្រើនឆ្នាំមកហើយ។
គេរំពឹងថា ចំណាត់ការរបស់លោកអភិបាលស្រុកសំរោងនៅពេលនេះ នឹងធ្វើឡើងដោយមានប្រសិទ្ធភាពបំផុត ហើយពលរដ្ឋក៏កំពុងរង់ចាំមើលលទ្ធផលនៅសប្តាហ៍ក្រោយផងដែរ៕