កាលពីថ្ងៃទី៦ ខែមេសា ឆ្នាំ២០២១ម្សិលមិញ កម្លាំងកងរាជអាវុធហត្ថការិយាល័យប្រឆាំងគ្រឿងញៀនខេត្តតាកែវ សហការជាមួយកម្លាំងកងរាជអាវុធហត្ថកោះអណ្តែង ដោយមានការសម្របសម្រួលនីតិវិធីពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវ បានចុះបង្រ្កាបករណីជួញដូរគ្រឿងញៀន នៅចំណុចភូមិព្រៃបាយ ឃុំពេជ្រសារ ស្រុកកោះអណ្តែត ដោយឃាត់ខ្លួនបានជនសង្ស័យម្នាក់ រួមជាមួយវត្ថុតាងជាគ្រឿងញៀនមួយចំនួន។
ជនសង្ស័យត្រូវបញ្ជាក់ថា មានឈ្មោះ ឃុន លុកគោ (ហៅគោ ) ភេទប្រុស អាយុ ៣៨ឆ្នាំ មុខរបរជាងផ្សារដែក និងមានដឺកាចាប់ខ្លួនលោកចៅក្រមស៊ើបសួរ នូ ដារ៉ា ចុះថ្ងៃទី២២ ខែមីនា ឆ្នាំ២០២០ផងដែរ ពីបទជួញដូរគ្រឿងញៀននេះដែរ។
ក្នុងនោះ សមត្ថកិច្ចក៏ដកហូតបានវត្ថុតាងរួមមាន៖ ក្រាមពណ៌សថ្លាចំនួន០២កញ្ចប់ធំ ទម្ងន់ ២០៣,១៩ក្រាម (ថ្លឹងទាំងសំបក់ថង់), ជញ្ជីងថ្លឹងគ្រឿងញៀន០១ ព្រមទាំង សម្ភារៈច្រកនិងវេចខ្ចប់ថ្នាំញៀនមួយចំនួន។
បច្ចុប្បន្នជនសង្ស័យ និងវត្ថុតាងការិយាល័យជំនាញប្រឆាំងគ្រឿងញៀនកសាងសំណុំរឿងបញ្ជូនទៅអមសាលាដំបូងខេត្តតាកែវចាត់ការតាមនីតិវិធី៕
