ភ្នំពេញ — នៅព្រឹកថ្ងៃទី២០ ខែកក្កដានេះ ប្រតិភូ និងអត្តពលិកកម្ពុជា បានធ្វើដំណើរទៅទីក្រុងតូក្យូ ប្រទេសជប៉ុនហើយ ដើម្បីចូលរួមការប្រកួតកីឡាអូឡាំពិក ឆ្នាំ២០២០ (Tokyo Olympic Game 2020) ដែលនឹងប្រព្រឹត្តទៅចាប់ពីថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) បានមានប្រសាសន៍ថា បេសកកម្មនេះ គឺជាមោទនភាពរបស់ប្រតិភូ និងកីឡាករ-កីឡាការិនី ដែលត្រូវបានជ្រើសរើសចូលរួមព្រឹត្តិការណ៍ពិភពលោក ៤ឆ្នាំម្ដងនេះ ។ លោកថា «អ្វីដែលយើងទាំងអស់គ្នា មានមោទនភាព គឺបេសកកម្មលើកនេះ ខុសពីលើកមុនៗ បើទោះបីមានការបារម្ភពីក្រុមគ្រួសារ ឬមិត្តភ័ក្ដ្រក៏ដោយ តែក្រុមរបស់យើង នៅតែមានឆន្ទៈមោះមុតក្នុងការចូលរួម ហើយត្រូវតែចូលរួមឲ្យបាន ដើម្បីតំណាងឲ្យព្រះរាជាណាចក្រកម្ពុជា តំណាងទង់ជាតិរបស់យើង ក្នុងពិធីបើកអូឡាំពិក ៤ឆ្នាំម្ដង ដែលយើងជាសមាជិក យើងមិនអាចលះបង់ការចូលរួមរបស់យើងបានឡើយ »
លោកថា កម្ពុជាយើងបានចូលជាសមាជិកគណៈកម្មាធិការជាតិអូឡាំពិកឡើងវិញ បន្ទាប់ពីថ្ងៃរំដោះ ៧មករាមក គឺនៅឆ្នាំ១៩៩៤ ហើយយើងបានចូលរួមការប្រកួតកីឡាអូឡាំពិក ក្រោយពីសង្គ្រាមស៊ីវិល គឺនៅឆ្នាំ១៩៩៦ ចឹងតាំងឆ្នាំ១៩៧២ រហូតដល់ឆ្នាំ១៩៩៦ ក្នុងរង្វង់នៃប្រទេសមានសង្គ្រាម យើងមិនបានចូលរួមទេ តែឥលូវនេះ គឺប្រទេសមានសុខសន្ដិភាពពេញលេញ ហើយប្រទេសជាតិក៏មានការរីកចម្រើន ចឹងហើយយើងទាំងអស់គ្នា ត្រូវតែថែរក្សាការចូលរួមក្នុងនាមសមាជិកភាព និងជាកាតព្វកិច្ចរបស់យើងឲ្យបានជារៀងរាល់ឆ្នាំ បើទោះបីមានបញ្ហាកើតក្នុងការរៀបចំអូឡាំពិកក៏ដោយ ក៏យើងត្រូវតែចូលរួមដែរ ព្រោះយើងទាំងអស់គ្នា មានស្មារតីអូឡាំពិកនៅក្នុងបេះដូងយើងទាំងអស់គ្នា ។
សម្រាប់ការដណ្តើមជ័យជំនះនៅក្នុងកីឡាអូឡាំនៅជប៉ុននេះ លោក វ៉ាត ចំរើន បានលើកឡើងថា ការប្រកួតឈ្នះចាញ់ គឺជារឿងមួយ ដែលការចូលរួមប្រកួតកីឡាអូឡាំពិក លោក Pierre De Coubertin គាត់បានមានប្រសាសន៍ហើយថា កីឡាអូឡាំពិក សំខាន់ជាងគេ គឺការចូលរួម ព្រោះជាការដែលធ្វើឲ្យពិភពលោកមានមិត្តភាព សាមគ្គីភាព និងសន្ដិភាព ដែលកម្ពុជាយើងបានដាក់ទ្រឹស្ដីក្នុងបាវចនា នៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ថា “កីឡារស់ក្នុងសន្ដិភាព” ។ ចឹងយើងទៅនេះ ទៅដើម្បីសន្ដិភាព ទៅដើម្បីលើកទឹកចិត្តម្ចាស់ផ្ទះ ទៅដើម្បីបំពេញកាតព្វកិច្ចជាសមាជិកចលនាអូឡាំពិកពិភពលោក ។
ហើយអ្វីដែលយើងចង់បានត្រឡប់មកវិញ គឺកិត្តិយសសេចក្ដីថ្លៃថ្នូដែលកីឡាករ-កីឡាការិនីរបស់យើង ខិតខំប្រឹងប្រែងក្នុងការប្រកួត ហើយប្រកួតដោយមោទនៈភាព គោរពគោលការណ៍ Fair-Play បទបញ្ជាការប្រកួត និងក្រមសីលធម៌កីឡាករ ។ ទោះបីគ្រូ និងកីឡាករ-កីឡាការិនីរបស់យើងមានចំនួនតិចមែន ក៏ប៉ុន្ដែយើងនឹងនាំត្រឡប់មកវិញនូវកិត្ដិយស មិនឲ្យយើងពាក់ព័ន្ធទៅនឹងសារធាតុដូប៉ា ឬរំលោភបទបញ្ជាការប្រកួតទេ ដែលនេះជាសារអបអរសាទរមួយ ដែលប្រមុខរាជរដ្ឋាភិបាល សម្ដេចតេជោនាយករដ្ឋមន្ដ្រី បានយកចិត្តទុកដាក់ណាស់ ចំពោះវិស័យកីឡា ពិសេសការយកចិត្តទុកដាក់ដល់កីឡាករ-កីឡាការិនីរបស់យើង៕