សមត្ថកិច្ចខេត្តព្រះសីហនុ នៅថ្ងៃនេះបានបញ្ជាក់ពីអត្តសញ្ញាណជនរងគ្រោះដែលត្រូវទឹកគួចហូរពេលមានភ្លៀងខ្លាំងកាលពីយប់ថ្ងៃទី២៤ ខែសីហា ឆ្នាំ២០២១ហើយ ដោយជនរងគ្រោះមិនមែនជាជនជាតិចិននោះទេ តែគឺជាជនជាតិឥណ្ឌូនេស៊ី។
ជនរងគ្រោះមានឈ្មោះ HENDRIK មានអាយុ ៣៦ឆ្នាំ។
គួរបញ្ជាក់ថា កាលពីព្រលប់ថ្ងៃទី២៤ ខែសីហា ឆ្នាំ២០២១ មានសេចក្តីរាយការណ៍ប្រជាពលរដ្ឋថា មានបុរសម្នាក់ត្រូវបានទឹកគួចហូរចូលទៅក្នុងប្រឡាយទឹកនៅចំណុចក្បែរសាលាដុនបូស្កូ ក្នុងភូមិ៥ សង្កាត់លេខ៤ ក្រុងព្រះសីហនុ ខណៈបុរសរូបនោះកំពុងដើរតាមផ្លូវ។
ក្រោយទទួលបានដំណឹងនេះ អាជ្ញាធរបានបើកប្រតិបត្តិការស្វែងរក និងជួយសង្រ្គោះ ប៉ុន្តែរកមិនឃើញនោះឡើយ រហូតដល់វេលាម៉ោងប្រមាណ ១១ព្រឹកថ្ងៃទី២៥ ខែសីហា ទើបគេប្រទះឃើញសាកសពជនរងគ្រោះនៅចំណុច អាចម៌មឹក ស្ថិតក្នុងភូមិ៤ សង្កាត់លេខ៤ ក្រុងព្រះសីហនុ៕