ភ្នំពេញ — នាព្រឹកថ្ងៃទី២១ ខែកញ្ញា ឆ្នាំ ២០២១ ក្រុមការងាររបស់ក្រុមហ៊ុនសាប៊ូលីប៉ាយ បាននាំយកសាប៊ូ ក៏ដូចជាសម្ភារៈទប់ស្កាត់ជំងឺកូវីដ១៩មួយ ចំនួន ប្រគល់ជូនគណៈគ្រប់គ្រងវិទ្យាល័យ-អនុវទ្យាល័យទាំង៩នៅក្នុងខណ្ឌដង្កោ។
ចូលរួមក្នុងកម្មវិធីកាលពីព្រឹកមិញនេះ គេឃើញមានលោក ទុយ ច័ន្ទ អភិបាលរងខណ្ឌដង្កោ ក៏ដូចជាលោកនាយកវិទ្យាល័យ-អនុវិទ្យាល័យ និងមន្រ្តីមូលដ្ឋានខណ្ឌជាច្រើនរូបទៀត។
ក្នុងឱកាសនោះ លោក ទុយ ច័ន្ទ បានមានប្រសាសន៍ថា អំណោយរបស់ក្រុមហ៊ុនសាប៊ូលីប៉ាយ នៅពេលនេះ គឺជាអំណោយ ដ៏មានសារៈសំខាន់ ចំពេលសាលារៀនបានបើកឡើងវិញ ដែលត្រូវចាំបាច់នូវការសម្ភារៈទាំងនេះដើម្បីប្រើប្រាស់នៅក្នុងសាលា ហើយលោកក៏បានផ្តែផ្តាំដល់លោកនាយក នាយករង លោកគ្រូ អ្នកគ្រូទាំងអស់ត្រូវយកចិត្តទុកដាក់អប់រំ ណែនាំសិស្សានុសិស្ស ចូលរួមអនាម័យ លាងដៃនិងសាប៊ូ ឬអាល់កុលជាប្រចាំដើម្បីចូលរួមទប់ស្កាត់ការរីករាលដាល នៃជំងឺកូវីដ១៩ និងអនុវត្តន៍នៅវិធានការរបស់រាជរដ្ឋាភិបាល ៣កុំ ៣ការពារ។
ជាមួយគ្នានេះ លោក ទុយ ច័ន្ទ ក៏បានជូនពរឲ្យក្រុមហ៊ុនសាប៊ូលីប៉ាយឲ្យមានការរីកចម្រើនក្នុងការប្រកបអាជីវកម្ម និងជៀសផុតនូវ ជំងឺកូវីដ១៩ ។
សម្រាប់លោក ប៊ុត ហេង នាយករងអនុវិទ្យាល័យ សម្តេច ហ៊ុន សែន ព្រៃវែង បានសម្តែងនូវក្តីរីករាល ដោយថា លោកនិងយកសម្ភារៈទាំងនេះទៅដាក់តាមបន្ទប់ទឹក និងមុខថ្នាក់រៀនដើម្បីអប់រំសិស្សឲ្យចេះអនាម័យ ដើម្បីជៀសផុតពីជំងឺកូវីត១៩។