អាជីវករផ្សារតាកែវរាប់សិបនាក់ កាលពីសប្តាហ៍កន្លងទៅនេះ បានលើកគ្នាធ្វើការតវ៉ាស្នើឲ្យអភិបាលខេត្តធ្វើអន្តរាគមន៍ ក្រោយពីពួកគាត់ទទួលដំណឹងមកថា ផ្សារដែលពួកគាត់ធ្លាប់លក់ដូររកប្រាក់ចិញ្ចឹមគ្រួសារ ត្រូវបានអាជ្ញាធរគ្រោងរុះរើ និងប្រគល់ឲ្យក្រុមហ៊ុនឯកជនមួយសាងសង់ឡើងវិញ បន្ទាប់មកគេនឹងដាក់លក់តូបម្តងទៀត។
ក្រុមអាជីវករទាំងនោះបានលើកឡើងថា បច្ចុប្បន្នពួកគាត់កំពុងជួបនូវវិបត្តិធ្ងន់ធ្ងរ គឺវិបត្តិកូវីដ១៩ ដោយលក់ដូរមិនសូវដាច់ មិនមានប្រាក់ចំណូលផង ហើយប្រសិនបើអាជ្ញាធររុះរើផ្សារ ហើយសង់ថ្មី ដោយតម្រូវឲ្យពួកគាត់ទិញតូបម្តងទៀតនោះ តើពួកគាត់មានប្រាក់ឯណាមកទិញទៅ? ដូច្នេះមានតែពួកគាត់លើកគ្នាមកសុំអន្តរាគមន៍ឲ្យលោកអភិបាលខេត្តជួយរកដំណោះស្រាយជូនពួកគាត់ផង។
ខណៈកំពុងលើកគ្នាតវ៉ា ដោយមានលើកជាបដាថា «មិនព្រមរុះរើឲ្យធ្វើផ្សារថ្មីជាដាច់ខាត» នោះ ស្រាប់តែមានកម្លាំងសមត្ថកិច្ចជាច្រើន បានចុះមកធ្វើការហាមឃាត់ និងបំបែកក្រុមអាជីវករ ក្រោមហេតុផលថា ការប្រមូលផ្តុំនោះ ខុសគោលការណ៍ របស់ក្រសួងសុខាភិបាល ស្តីពីការការទប់ស្កាត់ការរាតត្បាតជំងឺកូវីដ១៩។
តែយ៉ាងណាក៏ដោយ ក្រោយពីធ្វើការបំបែកការជួបជុំរួច មន្រ្តីសាលាខេត្តតាកែវ បានអនុញ្ញាតឲ្យតំណាងក្រុមអាជីវករចូលជួប ដើម្បីស្វែងរកដំណោះស្រាយ។ ហើយចំពោះលទ្ធផលយ៉ាងណានោះ យើងមិនអាចស្វែងរកការបញ្ជាក់បាននៅឡើយទេ។
ពាក់ព័ន្ធនឹងការវិនិយោគផ្សារតាកែវនេះវិញ បើតាមប្រភពគួរឲ្យជឿជាក់មួយបានឲ្យដឹងថា ឈ្មួញដែលចង់ធ្វើការវិនិយោគផ្សារតាកែវឡើងវិញនេះ គឺជាឈ្មួញតែម្នាក់ ដែលកំពុងធ្វើការវិនិយោគផ្សារណាត់ ក្រោមការជ្រោមជ្រែងរបស់អាជ្ញាធរ ដោយគេអាចប្រមូលលុយបានដល់ទៅខ្ទង់លានដុល្លារពីការលក់តូបឲ្យអាជីវករ ខណៈការសាងសង់នៅមិនទាន់ចាប់ផ្តើមនៅឡើយនោះ៕
