កំពត – កាលពីព្រឹកថ្ងៃចន្ទ (១៨ ខែ តុលា) ឯកឧត្តម ម៉ៅ ធនិន អភិបាលខេត្តកំពត បានអញ្ជើញចុះមកផ្សារសាមគ្គីនៃទីរួមខេត្តកំពត ក្នុងសង្កាត់កំពង់បាយ ក្រុងកំពត ដើម្បីសាកសួរសុខទុក្ខ អាជីវករក្នុងផ្សារសាមគ្គី។
ឯកឧត្តម ម៉ៅ ធនិន ចុះសួរសុខទុក្ខអាជីវករ
ក្នុងគ្រានោះ ឯកឧត្តម អភិបាលខេត្ត បានណែនាំដល់អ្នកទទួលម៉ៅការភាស៊ីទាំងអស់ មិនត្រូវយកលុយភាស៊ីលលើសកំណត់ដែលមានចែងនៅក្នុងសៀវភៅបន្ទុកនោះទេ ហើយជាពិសេសនោះគឺមិនត្រូវយកភាស៊ីចំពោះជនដែលមានវ័យចាស់ជរា ចាប់ពីអាយុ៦០ឆ្នាំឡើងទៅ និងកូនក្មេងវ័យតូចៗ ដែលគ្រាន់តែមកលក់បន្លែបង្ការ ត្រីសាច់ បន្តិចបន្តួចនោះឡើយ។
ក្នុងឱកាសនោះ ក្រុមអាជីវករក៏បានសំណូមពរមួយចំនួនដល់ឯកឧត្តមអភិបាលខេត្តឲ្យជួយដោះស្រាយជូនពួកគាត់ ហើយឯកឧត្តមព្រមទទួលការស្នើសុំរបស់អាជីវករក្នុងករណីមួយចំនួន ព្រមទាំងបានជូនថវិកាមួយចំនួនដល់លោកតា លោកយាយផងដែរ។
_
_
រំលឹកផងដែរថា ឯកឧត្តម ម៉ៅ ធនិន បានប្រកាសចូលកាន់មុខតំណែងអភិបាលនៃគណៈអភិបាលខេត្តកំពត កាលពីថ្ងៃទី១៣ ខែតុលា ឆ្នាំ២០២១៕
អត្ថបទ៖ សុខ នឿន
