តាកែវ – កាលពីវេលាម៉ោង២១និង២០នាទី យប់ថ្ងៃទី៨ ខែធ្នូ ឆ្នាំ២០២១ នៅតាមបណ្តោយផ្លូវជាតិលេខ២ នៅក្នុងភូមិតាបួ ឃុំពេជសារ ស្រុកកោះអណ្តែត ខេត្តតាកែវ មានករណីជនសង្ស័យចំនួន៤នាក់ បានធ្វើសកម្មភាពកាប់ប្លន់យកម៉ូតូ១គ្រឿងបានសម្រេច ដោយមិនបានរំខានសមត្ថកិច្ចនោះឡើយ។
ករណីនេះមានជនរងគ្រោះឈ្មោះ ឈន មករា ភេទប្រុស អាយុ២២ឆ្នាំ រស់នៅភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ ដោយនៅមុនកើតហេតុជនរងគ្រោះបានជិះម៉ូតូ ម៉ាកប៊ីត ពាក់ស្លាកលេខ តាកែវ 1V-9314 និងអ្នករួមដំណើរឈ្មោះ ហេង សុធារី ភេទស្រី អាយុ២៤ឆ្នាំ រស់នៅភូមិកណ្តាលក្រោម ឃុំបន្ទាយ ស្រុកកៀនស្វាយ ខេត្តកណ្តាល (ត្រូវជាសង្សា)។
តាមសម្តី នារីជាសង្សា បានឲ្យដឹងថា នៅមុនពេលកើតហេតុ រូបនាង នឹងជនរងគ្រោះ បានជិះម៉ូតូ ឌុបគ្នាដើរលេង រួចទៅញ៉ាំមីហិរ នៅភូមិដំណាក់ ឃុំពេជសារ លុះដល់វេលាម៉ោងខាងលើរូបនាង នឹងជនរងគ្រោះ បានឌុបគ្នាមកផ្ទះវិញ មកដល់តាមផ្លូវ ជនរងគ្រោះ បានឈប់ម៉ូតូ ចុះបត់ជើងតូច ស្រាប់តែពេលនោះ មានជនសង្ស័យចំនួន៤នាក់មិនស្គាល់ ជិះម៉ូតូ២គ្រឿង មកតាមពីក្រោយ រួចក៏បានចុះមកកាប់ លើជនរងគ្រោះ ជាច្រើនកាបិត យកម៉ូតូជិះចេញទៅទិសខាងជើងបាត់ស្រមោល។
ក្រោយកើតហេតុ ជនរងគ្រោះ រួមនឹងនារីជាសង្សា ត្រូវបានក្រុមគ្រួសារ បញ្ជូនទៅមន្ទីរពេទ្យ ដើម្បីសង្គ្រោះបន្ទាន់។
ជាមួយគ្នានេះ ជនរងគ្រោះក៏បានសំណូមពរទៅលោកស្នងការខេត្តតាកែវថ្មី ដែលទើបនឹងមកកាន់ដំណែង មេត្តាចាត់វិធានការស្រាវជ្រាវ តាមរក ចាប់ជនល្មើសទាំង៤នាក់ខាងលើយកមកផ្តន្ទាទោសទៅតាមផ្លូវច្បាប់ផង៕