(ភ្នំពេញ) – យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជាបានឲ្យដឹងថា នៅថ្ងៃទី១៤ ខែមេសា ឆ្នាំ២០២០ស្អែកនេះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នឹងចូលរួមកិច្ចប្រជុំកំពូលអាស៊ានពិសេស និងកិច្ចប្រជុំកុះពូលអាស៊ានបូកបីពិសេស តាមរយៈប្រព័ន្ធវីដេអូ (Video Conference) ដែលរៀបចំឡើងនៅវិមានសន្តិភាពរាជធានីភ្នំពេញ។
សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ក្នុងកិច្ចប្រជុំអាស៊ាននាពេលកន្លងមក
កិច្ចប្រជុំកំពូលអាស៊ានពិសេស និងកិច្ចប្រជុំកំពូលអាស៊ានបូកបីពិសេសនេះ នឹងផ្តោតសំខាន់លើបញ្ហា នៃវីរុសកូវីដ-១៩ ហើយពេលនោះ សម្តេចតេជោ នឹងថ្លែងសុន្ទរកថាចំនួន២ ស្តីពីផលប៉ះពាល់នៃកូវីដ១៩ ទៅលើការអភិវឌ្ឍសេដ្ឋកិច្ច និងសង្គម និងកំណើនសេដ្ឋកិច្ចពិភពលោក ព្រមទាំងផលប៉ះពាល់យ៉ាងធ្ងន់ធ្ងរ នៃកូវីដ១៩ ទៅលើសន្តិសុខ សេដ្ឋកិច្ច ពាណិជ្ជកម្ម និងកិច្ចការសង្គម ជារួម ដែលទាមទារកិច្ចប្រឹងប្រែងរួមគ្នាជាអន្តរជាតិប្រកបដោយប្រសិទ្ធិភាព និងទាន់ពេលវេលា ដើម្បីឆ្លើតបទៅនឹងការគំរាមកំហែង នៃកូវីដ១៩នេះ៕
